O Concello de Muros estrea a súa I Gala do Deporte. A cita, que de seguro acolle moito protagonismo, será o próximo sábado 21 de decembro no Auditorio do Centro Cultural e Xuvenil, a partir das 18:30 horas.

Con esta nova iniciativa, “queremos recoñecer publicamente o esforzo, a dedicación, a entrega e os valores que a través do deporte transmiten os clubs, entidades e deportistas de Muros”, asegura a alcaldesa, María Lago.
“Fainos moita ilusión a celebración desta gala, que ademais era moi necesaria no Concello de Muros para darlle visibilidade ao noso deporte, nun evento que será unha festa para toda a veciñanza”, afirma pola súa parte o concelleiro de Deportes, Damián Torea.

Presentación de candidaturas

O prazo para a presentación das candidaturas será ata ás 14:00 horas do venres 29 de novembro de 2024, e xa poden presentar as súas propostas en muros.gal. Haberá premios deportivos anuais nas seguintes categorías: 

• Mellor deportista feminina do Concello de Muros.
• Mellor deportista masculino do Concello de Muros. 
• Mellor club do Concello de Muros. 
• Promesa masculina máis destacada do Concello de Muros. 
• Promesa feminina máis destacada do Concello de Muros. 
• Especial da “veciñanza” (será para o/a deportista con maior número de votos realizados a través da web municipal. A selección das candidaturas correrá por parte do Concello). 
• Mellor evento deportivo municipal.

Entregarase tamén un recoñecemento especial do concello aos méritos conseguidos na súa traxectoria deportiva por deportistas locais, persoal ou directivos dos clubs, e ata tres mencións especiais.