Sábado. 20.07.2024
El tiempo

Muros estrea novo orzamento municipal, que levaba sen actualizar dende 2021

CONCELLO DE MUROS
Muros estrea novo orzamento municipal, que levaba sen actualizar dende 2021

Estamos xa no mes de xullo, pero nunca é demasiado tarde para ordear as contas. Muros non contaba con orzamento actualizado de 2021. Levaba prorrogando as contas nos últimos anos, e por fin, o pleno extraordinario de onte aprobaba o orzamento municipal para o ano 2024. Fíxoo cos os votos a favor dos grupos de BNG e PSdeG, e os votos en contra de PP e Muros Centrado.

O orzamento aprobado é de 9.462.925,52 euros, e destacan o "acenso social" dos mesmos, así como a partida de 1.254.217,30 euros para investimentos reais (13,25% do total), que se destinarán á realización de obras e actuacións que mellorarán os servizos e infraestruturas en todas as parroquias.

“Máis aló dos grandes proxectos, consideramos prioritario mellorar a vida dos nosos veciños e veciñas con obras de pavimentación, saneamento, abastecemento, ou acondicionando inmobles municipais para darlles un uso social”, explica a rexedora María Lago.

Pola súa parte, a tenenta de alcaldesa, Caridad González, explica que “con este orzamento solucionamos a carencia de persoal coa que nos atopamos ao chegar o goberno, ademais de abonar numerosas facturas de proveedores que levaban case un ano de retraso”.

A partida para gastos en servizos e bens correntes é de 2.053.876,40 euros (21,70% do total), para afrontar entre outras cousas o Servizo de Axuda no Fogar (SAF). O concello reforzará todas as medidas sociais e de apoio á conciliación. 

Nas trasferencias correntes (1.213.111,57 euros) destaca a partida para facer fronte ao importante aumento das cotas de recollida de lixo na Mancomunidade de Municipios da Serra de Barbanza.

No capítulo de gastos de persoal (4.566.358,31 euros), recóllense a totalidade dos postos de traballo do persoal funcionario e laboral fixo e indefinido coas retribucións actualizadas, de acordo coa vixente Lei de Orzamentos Xerais do Estado.

Dótanse as prazas do persoal que se xubila coa intención de cubrilas e reforzaranse a Policía Local, a limpeza viaria, a brigada de obras e a plantilla de auxiliares do SAF.

Comentarios