"Cada día que pasa sen abrir este Centro de Día é un fracaso colectivo"

maiores dependencia centro de día

Plataforma %22Xuntos polo Centro de Día de Corcubión — Algúns dos representantes da Plataforma Xuntos polo Centro de Día de Corcubión

"Cada día que pasa sen abrir este Centro de Día é un fracaso colectivo"

11:51 01/08/26

Despois do polémico pleno deste pasado xoves no que os tres grupos da opoosición rexeitaron unha moción para dar un paso fundamental de cara á apertura do demandado Centro de Día de Corcubión, faltaba coñecer a posición da entidade veciñal que leva anos pelexando por facer realidade unha necesidade fundamental para a vila de San Marcos e a comarca.

"Os intereses da veciñanza deben estar por riba das diferenzas políticas"

Mentres o grupo de Sempre Corcubión argumenta a súa negativa pedindo "información" e "transparencia", e alegando que non coñecen os convenios nin os pormenores económicos do proxecto, a Plataforma Apartidista Xuntos polo Centro de Día de Corcubión quere amosar a súa "profunda preocupación pola situación que está a vivir o Centro de Día Comarcal de Corcubión tras coñecerse que os desacordos políticos poñen en risco unha achega económica fundamental para a súa apertura".

"Levamos demasiado tempo advertindo de que o Centro de Día non pode seguir sendo refén das loitas partidistas nin dos intereses particulares. As persoas maiores que precisan deste servizo e as súas familias non poden continuar pagando as consecuencias dunha confrontación política que só provoca máis atrasos e máis incerteza".

"Facemos un chamamento a todos os grupos políticos con representación no Concello de Corcubión para que antepoñan o interese xeral da cidadanía por enriba de calquera diferenza ideolóxica ou estratéxica. Os representantes públicos foron elixidos para solucionar problemas, non para agravalos".

"Desde esta plataforma apartidista reclamamos diálogo, responsabilidade e altura de miras. É imprescindible alcanzar un consenso que permita desbloquear definitivamente esta situación e garantir a apertura dun servizo esencial para toda a comarca".

"As persoas dependentes e os seus coidadores levan demasiados anos esperando. Non poden permanecer máis tempo secuestrados por desacordos entre quen ten a responsabilidade de representalos. Cada día de atraso supón unha oportunidade perdida para mellorar a calidade de vida de moitas familias.

"Cada día que pasa sen abrir este Centro de Día é un fracaso colectivo. Cada atraso ten nome e apelidos: son as persoas dependentes que non reciben a atención que merecen, son os familiares e coidadores que soportan unha carga cada vez maior e son os veciños que ven como unha infraestrutura pública permanece inutilizada."

"A historia xulgará a quen traballe para unir e resolver, e tamén a quen antepoña os intereses políticos ás necesidades reais da veciñanza."

"A Plataforma Xuntos polo Centro de Día de Corcubión seguirá defendendo, con independencia e sen siglas políticas, a apertura inmediata deste servizo tan necesario".