Dende onte, mércores, e ata o domingo, as praias de Razo (Carballo) e Caión (A Laracha) acollen probas internacionais de surf.

Onte tiñan lugar os campionatos galegos previos ao Campionato de Europa Cabreiroá Junior Pro Razo-Caión. As probas desenvolvéronse cunhas condicións excepcionais que deixou aos galeg@s un surf espectacular. Na sub21 feminina gañaron e se clasifican para as probas europeas Cristina De Llano e Mar Regueira na segunda posición. Na categoría masculina clasificáronse o oleirense Manuel Fernández por diante de Sebastian Bamonde.

A partir de hoxe a praias bergantiñás convírtense "no epicentro no ámbito deportivo internacional, acollendo na Costa da Morte aos mellores surfistas juniors do circuito internacional”, como sinalaron na presentación do campionato de Europa Cabreiroá Junior Pro Razo-Caión.

Ademais do interese deportivo, destacan o potencial turístico desta proba nas que participan máis dun cento de deportistas de todo o continente.  

Unha proba que conta cun servizo de conciliación,  cun espazo de lecer instalado en Razo con obradoiros e un servizo dedicado ao coidado profesional e permanecerá aberto ata o próximo domingo 24.