Onte tocaba visita da vicepresidenta da Deputación, Goretti Sanmartín, polo Concello de Zas. Tocaba avaliar as liñas de colaboración existentes e, en especial, a delegación da xestión das Torres do Allo, aprobada no pasado pleno da corporación, primeiro paso de cara á futura transferencia da titularidade do ben.

Por vez primeira, o Concello de Zas xestionará a visita e difusión das Torres do Allo, un dos bens patrimoniais da Deputación da Coruña, a través dun convenio que contempla a atención a visitantes e a promoción dun dos monumentos de referencia na comarca.

Unha boa aposta para manter vivo un legado histórico e etnográfico, desafortunadamente durante moitos anos pola Asociación Neria. Polo de pronto, xa se albisca un completo programa de actividades e visitas para dar a coñecer o patrimonio durante este verán.

O alcalde de Zas, Manuel Muiño, mostrouse receptivo á proposta de transferencia da titularidade do ben que ambas institucións estudarán conxuntamente mais, polo momento, valorou que a xestión de visitas e a promoción pasen a depender do propio concello. “Queremos dar a coñecer as Torres do Allo, en primeiro lugar na propia comarca e preparamos un programa de visitas escolares xa que os rapaces e rapazas da contorna descoñecen o monumento”, sinalou Manuel Muiño que confía na posibilidade de promover as Torres do Allo como porta de entrada principal de visitantes que se dirixen á Costa da Morte. “A súa particular situación na estrada de maior afluencia á Costa da Morte dálle posibilidade de se converter nun escaparate da riqueza turística e patrimonial da ruta, desde Dombate a Camariñas ou Fisterra”, sinalou.

O convenio de colaboración aprobado no pasado pleno da Deputación para a delegación da xestión das Torres do Allo está dotado con 33.000 € destinados á atención das visitas ao monumento e á programación para a súa difusión. Ademais, falouse da Carballeira de Zas, que concorrerá a unha liña de axudas destinadas a festivais.

Fonte

• Deputación.