Agustín acredita nos Mayas e outras historias

11:43 27/04/12

A paralización das obras da autopista da Costa da Morte pon de manifesto varias cousas. A primeira, que o Conselleiro de Infraestructuras minte máis do que fala. El mesmo, a vista do escándalo formado polo xeito no que o goberno Feijoo detivo as obras xa licitadas e outorgadas polo gobernó bipartito, decidiu marcarse un calendario de actuacións que remataría coa autopista “lista e disposta nesta lexislatura”. Referiase a lexislatura autonómica, esa que debería quedar disolta en 2013 pero que, segundo os que saben disto, vai ser finiquitada xa, neste mesmo ano con convocatoria de eleccións a fume de carozo. Cada semana que pasa, cada novo recurte de Rajoy, cada nova medida a ditado de Alemaña coloca un novo cravo no cadaleito electoral do PP en Galicia. O feito de que os populares só poidan gobernar se obteñen maioría absoluta (a culpa é deles, por merendarse ao resto de partidos democristianos) fai que cada semana de desastre nacional implique perda de votos en Galicia Esto o saben os estrategas do partido pero tamén Agustín Hernandez, auténtico peso pesado no PP Galego, chamado a dirixir o partido en ausencia de Feijoo e que por esta razón foi branco das iras xudiciais dos socialistas despois dunha serie de feitos ocorridos cando se ocupaba da licitación de obras en Pontevedra. Este peso, esta importancia, fai canto máis salientables as verbas do Conselleiro, casi suplicante, pedindo entre liñas a base do PP na comarca tempo, marxe de manobra para dar aló menos apariencia de que en realidade a obra máis crucial na historia recente da comarca non sexa a que finalmente (esta vez si) lle coste ese posto de privilexio. Non deixo de pensar no Conselleiro de xeonllos diante dalgunha imaxe precolombina, rezando a Tepeu ou Kukulkan para que fagan realidade a lenda que di que o mundo acaba cando os Mayas remataron os días do seu calendario, o 21 de decembro de 2012. Será ese o único xeito en que o Conselleiro de Infraestructuras non incumpra de novo a palabra dada e deixe una vez mais, con calquera excusa inadmisible, a Costa da Morte sen a súa única vía de comunicación a altura do século no que estamos. Que o mundo acabe para que a obra non se poida utilizar en 2013 e non sexa pola súa culpa. Din os que saben disto que en cuestión de semanas Feijoo anunciará un adianto electoral que levaría os comicios ao verán ou incluso antes. Din os que saben disto que cada consello de Ministros, en Galicia os corrillos na sede do PP fanse cos dedos cruzados para pedirlle a San Benitiño que Galicia non sexa das que mais padezan o enésimo recorte. Os que saben din tamén que cada mes o PP en Galicia perde entre 0.5 e 1 punto de porcentaxe de voto con respecto ás últimas eleccións, e iso, din, sen que exista una alternativa real e viable ao goberno Popular. Din que o desastre pode ser descomunal e premonitorio dun novo tempo. E aí é cando eu cruzo os dedos.