Cortalumes

Firmas QPC

Cortalumes

10:28 16/11/12

Hoxe vou ser breve. Levo moito escrito e esta semana levo moito lido ao fío da Folga Xeral do pasado mércores. Mentres calquera con ollos e as catro regras aprendidas puido apreciar que millóns de españois se tiraron a rúa en protesta polo que consideran unha estafa e non unha crise, a caverna mediática segue na súa e tarde ou cedo debería parar.

Non só polo insulto a intelixencia que implica escoitar cousas do tipo “eran catro gatos” ou “non fixo folga ninguén”, cousas que ou son falsas ou son certas a medias (fixo folga moita xente, pero unha maioría temeu polo seu futuro e quedou no chollo…por se as moscas). As razóns que me levan a pedirlle senso e medida a caverna e adheridos na crítica pasa polo que sucedería se non existirán mecanismos democráticos de protesta como, por exemplo, a folga e a manifestación cívica e pacifica.

Porque xusto detrás destes, a menos de un palmo, están o lume e a sangue. 6 millóns de parados, insolencia tras insolencia, recortes, regresión da democracia ao medievo, brutalidade policial e reformas legais en aras a maior gloria da igrexa e da extrema dereita. A este cóctel Molotov só lle resta unha mecha, un detonador, que será de forma e tipo descoñecido pero que, non o dubide ninguén, provocara longas horas de drama e dor. E non só entre a veciñanza e o pobo. Non.

Porque o segundo paso cando un non ten nada é pasar cumprida vinganza. Senón pode alguén molesto e afectado polas desastrosas medidas dun goberno manifestarse ou ir a folga, que debe facer?, matar a alguén?, prenderlle lume a algo, un parlamento por exemplo?

Antes de que alguén diga que fago apoloxía do terrorismo digo que calma. Para nada. Pero os cortalumes da sensatez e do civismo son finos, están sen desbrozar e unha mínima chispa pode prender no monte da cordura da masa de indignados e descontentos que si son maioría e provocar un lume devastador e difícil de sofocar.

Calma.