Non descubrimos nada novo ao asegurar que as liñas mestras da política económica dun concello se conteñen no presuposto. Tampouco estraña, xa, o uso nalgúns dos nosos municipios de técnicas de planificación vangardistas, como o orzamento participativo, onde a poboación intervén directamente manifestando as súas prioridades. Pero, que non se respecte o prazo legal da aprobación do orzamento e deba prorrogarse o do exercicio anterior, segue, cando menos, sorprendendo.

O certo é que ningunha entidade da área de influencia de Que pasa na Costa aprobou o seu orzamento antes do prazo legal (31 de decembro de 2012), e os concellos de Camariñas, Carnota, Corcubión, Fisterra, Malpica e Vimianzo, a día de hoxe –insisto– a día de hoxe, continúan sen aprobalo definitivamente.

Datas de aprobación definitiva e da entrada en vigor dos presupostos municipais dos nosos concellos:

En definitiva, a entrada en vigor do orzamento (unha vez publicado no BOP), formalízase tarde. Avanzado o exercicio. Porén, esta realidade que se repite sistematicamente, ano tras ano, e vulnera o principio básico de anualidade orzamentaria, provoca significativas consecuencias que procedería evitar.

Porque, o orzamento, cando se aproba fóra de prazo, desvirtúa a súa natureza e función programadora, prexudica a consecución e outorgamento de subvencións. Afecta á execución de investimentos e, en xeral, debilita a actividade economico-financeira da entidade. Cuestións, todas elas, o suficientemente importantes como para que os nosos alcaldes prescindan da prórroga orzamentaria, actuando con máis rigor.

Trátase doutra asignatura pendente do municipalismo galego, non a máis importante, seguro, pero é unha incidencia que, estarán de acordo comigo, debe superarse para dignificar a institución municipal.

• Domingo Guerra ([email protected]). Economista. Especialista en economía pública e política económica pola USC.

Outros artigos de Domingo Guerra

• Presión fiscal dos nosos concellos.

Fonte

• Redacción de QPC ([email protected]).