Mércores. 08.12.2021
El tiempo
David Castro
08:35
14/03/12

David Castro entrevista ao árbitro Adrián Varela

David Castro entrevista ao árbitro Adrián Varela
Presentamos hoxe un novo colaborador de QPC Deportes centrado no #fútboldacosta. David Castro, dende Carballo, daranos "Outra visión do fútbol e do deporte costeiro". Hoxe, para comezar, fala cun dos colectivos menos famosos do mundo do fútbol: os árbitros. Se Anxo Garrido fixera o propio co colexiado Marcos Ordóñez, hoxe David Castro fala co Adrián Varela.

Entrevista con Adrián Varela

Adrián Varela García, nado en Carballo o 23 de xuño de 1991, é un novo árbitro de fútbol e do cal din que ten unha gran proxección na faceta máis complicada do deporte rei. Agora mesmo, está arbitrando en categorías base e na 3ª Autonómica, pero posiblemente para o ano que vén, verémolo nunha categoría máis arriba.
  • David Castro: Boas Adrián, que che fixo empezar nesto da arbitraxe?
Adrián Varela: Tiña a ilusión de probar na arbitraxe a ver que tal me ía e o final gustoume aínda máis do que pensaba.
  • D.C.: Gardas bo recordo do teu debut como colexiado ou xa tiveches un difícil comezo?
A.V.: Pois recordo que debutei en fútbol 7 na Torre de Hércules e a verdade que o levei ben.
  • D.C.: Os xogadores, e eu inclúome, somos bastante protestóns, ¿é moi difícil aguantarnos?
A.V.: Todo ten un límite pero eu tamén entendo que os xogadores cando están competindo están algo tensos. Pero todo ten un certo límite.
  • D.C.: Na túa época como xogador, tanto nas categorías base do Bergantiños como do Coristanco, cal era o teu comportamento cos árbitros?
A.V.: Pois a verdade é que nunca me expulsaron por protestar. Excepto nun partido de xuvenís co Coristanco que fun expulsado por dobre amoestación por dous lances do xogo.
  • D.C.: Cal cres que é a zona máis difícil para os colexiados?
A.V.: Eu creo que non hai zonas mellores nin peores. Cada partido sempre é un mundo.
  • D.C.: A nosa zona é a da Costa e quizais é a que peor fama ten en canto se debe ao comportamento no campo. Que opinas disto? A fama é merecida ou son cousas do pasado?
A.V.: Niso discrepo, porque desde que empecei a arbitrar ata o de agora nunca tiven nin o mínimo problema tanto con xogadores, como delegados ou adestradores da Costa. Penso que é máis ben cousa do pasado. Pero bueno, sempre pode haber algunha excepción, como a lamentable agresión que recibiu un compañeiro fai dúas semanas pero por un caso aillado non debemos xulgar a zona da Costa.
  • D.C.: Fai unhas semanas fuches arbitrar un dos que quizais fora un dos partidos máis importantes da túa corta carreira como colexiado. Foi o Outes - Cerqueda. ¿Que tal se desenvolveu o partido?
A.V.: Pois moi ben. Foi un partido moi loitado por ambos equipos e moi bonito con ocasións para os dous conxuntos.
  • D.C.: Ultimamente varios colexiados foron agredidos nos campos de fútbol galegos. Hai unhas semanas un ex –compañeiro de equipo teu nos xuvenís do Coristanco como é, Rubén Reborido foi atacado por un xogador do Lira logo de que o trencilla o expulsara no encontro en Arliña contra o Muxía. E hai varias semanas tamén outro árbitro foi agredido por tres xuvenís do Atlético Sobrado no partido contra o Bergantiños B. Tanto no caso do xogador do Lira como os do At. Sobrado foron expulsados do seus respectivos equipos. Cres que é suficiente con anularlle as licenzas federativas?
A.V.: Eu xa dixen que eses eran casos illados que non deberían existir. En canto a si é suficiente con esa sanción ou non, non opino xa que non son cousas do árbitro.
  • D.C.: Estás de acordo comigo de que nestes casos pagan xustos por pecadores, xa que ten que facer fronte as multas e penalizacións son os clubs e non os que verdadeiramente son os culpables destes sucesos?
A.V.: Pois a maioría das veces pasa iso.
  • D.C.: Un novo colexiado de Vilagarcía de Arousa, de 20 anos, sufriu unha brutal agresión no partido entre o equipo do Mosteiro e o de A Lama no que un xogador visitante propinoulle un cabezazo que tivo como consecuencias unha fisura en varios osos do nariz, varios dentes rotos e dificultade para falar pola inflamación bucal. Feitos como este, non quitan as ganas de seguir no mundo da arbitraxe?
A.V.: Grazas a deus ata o de agora nunca tiven ningún altercado deses, pero penso que son circunstancias complicadas e que se pasa un trago bastante amargo e pode caber a posibilidade de abandonar. Pero eu creo que temos que seguir adiante e seguir defendendo a arbitraxe. Desde aquí quero mandar publicamente moitos ánimos para eses compañeiros que foron agredidos. Sobre todo o caso que coñezo de primeira man, o de Rubén Reborido que ten 17 anos e que lle queda moito que disfrutar na arbitraxe.
  • D.C.: Moitas grazas e desexámosche o mellor neste mundo tan difícil como é o da arbitraxe.
A.V.: Moitas grazas a ti e a todo o equipo de QPC e noraboa pola web.

Máis información

Nova relacionadas

Fonte

comentarios