O urbanismo está vinculado ao progreso social e económico dos concellos, porque afecta á convivencia cidadá e inflúe nas finanzas municipais.

Como se mesturan os intereses particulares dos cidadáns co interese xeral, debe ser tutelado pola Administración Pública. De aí que, para contribuír a protexer o territorio, como se informou recentemente neste diario, a Axencia de Protección da Legalidade Urbanística ordenara a demolición de determinadas obras ilegais, nalgúns dos nosos concellos.

Ademais da innegable dimensión social, afirmamos tamén que a actividade urbanística contribúe á economía municipal. Efectivamente é así. Nos ingresos, a través dos impostos sobre bens inmobles; sobre construcións, instalacións e obras; sobre o incremento do valor dos terreos de natureza urbana; e mediante determinadas taxas (licencia urbanística e informes urbanísticos, por exemplo).

Así mesmo, ten importantes efectos no gasto orzamentario, singularmente en materia de persoal (arquitectos, aparelladores, outros técnicos e policía urbanística), e nos custes derivados do proceso de urbanización (acondicionamento de camiños, subministro de auga, recollida de lixo, sumidoiro, electrificación, etcétera).

Con todo, e ao marxe destas repercusións tributarias e financeiras, o urbanismo ten unha importancia transcendental nos concellos porque actúa sobre un recurso escaso, limitado e dificilmente renovable: o solo.

Por iso, debemos aspirar a unha ordenación racional do espazo, evitando a degradación da paisaxe, preservando e consolidando a nosa identidade territorial. E, por iso, aplaudimos á Axencia de Protección da Legalidade Urbanística que obrigou aos infractores a demoler o ilegalmente construído, forzando a súa execución mediante multas ata restaurar a legalidade perturbada.

Por certo, a día de hoxe, tan só están integrados nesta axencia os concellos de Cabana (DOG 18/10/2013), Carballo (DOG 15/11/2012) e Ponteceso (DOG 24/05/2013). Tal vez, sexa bo momento para que o resto dos nosos concellos se adhiran. Porque, delegando ou transferindo as facultades de inspección, a impunidade dos infractores, seguro, será menor.

• Domingo Guerra ([email protected]). Economista. Especialista en economía pública e política económica pola USC.

Novas relacionadas

• 31-03-14: A Xunta anuncia a demolición das 3 casas ilegais de Mar de Fóra.
• 03-03-14: Dous hoteis ilegais demolidos en Muros.

Outros artigos de Domingo Guerra

• Loito por culpa do mar.
• Remanente de tesourería.
• Eficacia recadatoria.
• Oportunidade perdida.
• Gasto de persoal.
• Rendición da conta xeral.
• A Conta Xeral.
• A contribución.
• Cuestión de confianza e moción de censura.
• Débeda municipal.
• A prórroga do orzamento municipal.
• Presión fiscal dos nosos concellos.

Fonte

• Redacción de QPC ([email protected]).