Espectacular o vídeo animado creado por Kiko González de Lema coa axuda da Intelixencia Artificial, e coa música de De Ninghures, que acompaña ao Calendario 2026 do Concello de Carballo. No marco do proxecto Carballo na Memoria, o calendario recolle unha colección de fotografías datadas entre finais dos anos 20 e principios dos 30, algunhas delas inéditas. As imaxes forman parte da Colección Loty, custodiada polo Arquivo Histórico Provincial de Lugo.

“A Casa Loty foi fundada no ano 1918 en Madrid por Justin Marie Charles Alberty Jeanneret, un francés que se dedicaba ao comercio de papel fotográfico. A mediados dos anos 20, Charles Alberty e a súa esposa, Concepción López crean un banco de imaxes de varios países destinado a axencias de prensa, publicacións e empresas de turismo que tivo importantes clientes e recibiu numerosos premios a nivel internacional", explicou agradecida Ángeles Pacoret. E tamén que o nome Loty “é o resultado de unir a primeira sílaba do apelido de Concepción López e a última do apelido de Charles Alberty”.

Para esta marca traballaron varios fotógrafos, pero podemos dar case por seguro que o autor das imaxes de Carballo foi o portugués António Pedro Carreta Passaporte, que foi fotógrafo da casa Loty entre 1926 e 1936, e fixo fotografías de monumentos e paisaxes, principalmente para a súa comercialización en tarxetas postais.

Este ano o calendario inclúe as feiras (lembren, o segundo e o cuarto domingos de cada mes, e o quinto cando o hai). Así, a partir de hoxe martes, as persoas interesadas poderán recollelo de balde nos lugares de costume: Museo de Bergantiños, Biblioteca Rego da Balsa e
casa do concello.