Despois de visitar o Parlamento Anpas Galegas Nieves Villar e Hadrian visitaron a Valedora do Pobo

“Comezaremos a traballar inmediatamente, porque o tema é importante e necesario”.

Esa foi a resposta da Valedora do Pobo, Milagros Otero, trala visita da malpicá Nieves Villar acompañada pola directiva da Confederación ANPAS GALEGAS para esixir unha nova, e completa, normativa sobre atención educativa hospitalaria e domiciliaria para os casos de longa enfermidade.

Quedou moi satisfeita a expedición coa atención e o interese demostrado pola Valedora, e valoran a intención de poñerse a traballar en solucións, ao contrario do que ven facendo a Consellería de Educación, quen nega o problema e condena á desatención educativa a todos os nenos e nenas galegos enfermos. Precisamente Nieves reiterou a reivindicación da xuntanza co Conselleiro de Educación, xa que despois do primeiro plante, aínda non tivo a ben recibila.

A idea principal foi trasladarlle á Valedora o que ven sendo a principal reclamación: "xuntémonos, falemos e construamos entre todos unha nova normativa que responda ás necesidades reais", contando con todos os implicados dende os familiares, especialistas do eido da sanidade, do ensino e da política.

Describindo a situación

Nieves Villar contou a súa experiencia, fundamental para poñer os pés no chan, que é algo que é moi preciso facer cando se teoriza. Nieves contou detidamente a súa experiencia, que podería ser a de calquera outra nai dun neno-a enfermo-a, de permanentes demandas e de constantes negacións dos dereitos do seu fillo por parte das autoridades educativas, así como de todas as conquistas conseguidas a través da propia exposición pública nos medios de comunicación, nunca doutra maneira.

Pola súa parte, as ANPAS describiron a situación presente como "de desorganización, e de abandono por parte da administración educativa da obriga de dar cobertura aos dereitos dos escolares enfermos".

As demandas

E tocaba falar de propostas, baseándose en que "a atención educativa hospitalaria e domiciliaria tense que constituír como un dereito específico, que non sexa precisa a iniciativa das familias para que comece a funcionar, que ten que haber unha atribución de horas mínimas, que logo se modularán en función das posibilidades físicas da enfermidade pero que deben estar fixadas previamente coa intención de que os escolares enfermos non vexan detida a súa vida educativa coa enfermidade, que debe existir unha conexión entre as diferentes fases do proceso para que os diferentes profesionais que se ven afectados, titores de procedencia-mestres da escola hospitalaria-mestres de atención domiciliaria e titores de destino, poidan traballar todos dun xeito conxunto e coordinado".
Tamén fixeron fincapé na "necesidade de considerar a longa enfermidade nun senso moi amplo, incluíndo todos os casos e doenzas que impidan que un neno ou neno asistan a clases dun xeito normalizado, sexa por unha longa enfermidade de prognóstico difícil, ou sexa por unha doenza crónica, unha lesión ou calquera outra circunstancia que altere a vida ordinaria desa persoa".
Igualmente remarcaron a importancia de asumir que "aínda que sempre falamos de nenos e nenas, este non é un problema que afecte só á infancia, senón que pode darse en calquera idade e en calquera nivel do Ensino obrigatorio, e de feito é nos niveis superiores onde é máis necesario traballar con especial atención, non só pola dificultade da carga académica que soportan, senón porque son idades nas que a necesidade de non se separar da propia xeración cobra un valor moito máis alto e transcendente para a vida futura". Novas relacionadas

• Hadrián e Nieves unen 1000 mans por unha Atención Educativa Domiciliaria e Hospitalaria decente.
• “Eu non veño polas horas do meu fillo, senón polas horas de todos os fillos enfermos”.
• O Conselleiro deixa plantada a nai do malpicán Hadrián.
• As Anpas Galegas inician unha campaña de reivindicación por unha correcta atención educativa para os alumnos enfermos.
• Hadrián, punta de lanza para unha campaña galega pola atención hospitalaria e domiciliaria
• A federación de Anpas da Costa da Morte reúnese coa nai de Hadrián
• Por unha atención educativa domiciliaria decente para Hadrián

Fonte

• Redacción QPC ([email protected])