O vento e a choiva protagonizan o entroido

Cabana Camariñas Carnota Cee Corcubión Dumbría

O vento e a choiva protagonizan o entroido

12:20 04/02/16

Gastronomía, sátira e diversión serán os principais ingredintes do entroido 2016 na Costa da Morte. Todos os concellos sacan a relucir as súas actividades para estes días coas que pretenden entreter a unha boa parte dos seus habitantes. O único que non o fará é o de Carnota que, en solidaridade coa familia do veciño desaparecido, suspende todos os actos que tiña programados. Segundo as previsións metereolóxicas de de 4gotas, o vento e a choiva tamén serán os protagonistas desta festeira fin de semana. "Na xornada de hoxe venres, mantéñense os ceos azuis e as temperaturas agradables durante o día. Xa mañá, sábado, achégase unha fronte desde o Atlántico que trae vento do suroeste desde as primeiras horas da mañá superando os 100 quilómetros por hora e deixando choivas intensas cara o mediodía. Xa pola tarde, as precipitacións serán máis febles e pola noite algo máis espalladas, especialmente entre Muxía e Muros, deixando polo tanto o Entroido de Fisterra pasado por auga. O domingo seguirán as nubes e os orballos na parte sur e no interior da Costa, quedando o ceo máis aberto e case sen chuvias canto máis preto de Malpica. Seguirá o luns á mesma configuración e semella que o martes volverá a pasar outra fronte activa deixando forte vento e chuvias intensas que se prolongará ata o mércores de cinza. Ademais do tempo do terra cabe estar atentos ao mar. O vento será moi forte mañá e martes e o mar de fondo tamén será moi alto por mor das borrascas que se situarán ao oeste-noroeste de Irlanda". Venres, 5 de febreiro: as citas do entroido

Promete o entroido de Santa Comba coa cervexa, o rock e a artesanía como ingredintes principais. Dende hoxe e ata o domingo, o Recinto Feiral da vila acolle a I Festa da Cervexa Artesá Galega, acompañada dunha feira de artesanía e das mellores bandas de rock da zona. Pinchar aquí para ver o programa completo.
Fisterra dálle ás 12 horas o pistoletazo de saída ao entroido coa inaguración da I Mostra da Historia do Entroido de Fisterra que está instalada no mercado municipal.

Sábado, 6 de febreiro: as citas do entroido

Un ano máis, Vimianzo énchese de entroideiros. O tradicional desfile pola rúas da vila sae ás 16:30 horas da praza do Concello. Un xurado - entre o cal estarán membros de QPC - será o encargado de outorgar os premios aos mellores disfraces. O martes será festividade na localidade.
Mazaricos comeza ás 16:30 horas o seu particular "entruido" no que haberá música, xogos, doces típicos da época e moitas vaquillas. Ademais os locais do municipio ofrecen pinchos moi carnavaleiros. Por mor do tempo, trasládanse as actividades ao pavillón municipal.
Unha das citas máis esperadas destas datas na Costa da Morte é o entroido de Fisterra que este ano, como novidade, trasládase ao sábado. QPC estará presente como parte do xurado e o grande Xurxo Souto como pregoeiro.
Continúa a I Festa da Cervexa Artesá Galega no recinto feiral de Santa Comba onde tamén haberá unha mostra de artesanía e concertos de rock. Pinchar aquí para ver o programa completo.
O mal tempo obriga a desprazar os actos do entroido de Laxe para a praza dos Voluntarios. Mañá a partir das 17 horas a festa comeza co desfile de comparsa que estarán acompañadas da música do Tren da Unha e dunha boa chocolatada con filloas.
Ás 16 horas partirá da praza Castelao de Corcubión unha comitiva de entroideiros que percorrerán a vila ata chegar á casa da Cultura. Alí esperánlle premios,música e unha chocolatada.
Camariñas celebrará o entroido cunha festa do cocido que será ás 22 horas no pavillón municipal. A orquesta Ciclón animará o ambiente.
Tamén en Baio aproveitan o entroido para facer unha gran cea baile, organizada pola asociación cultural Adro. Así o sábado, ás 21 horas, os veciños e veciñas da vila dánse cita no pavillón onde haberá unha gran laconada, disfraces e moita festa.

Domingo, 7 de febreiro: as citas do entroido

Se o sábado será a cita do Entroido en Fisterra, o domingo toca a xa obrigada parada en Dumbría. Cada ano mellora a participación e todo parece indicar que este 2016 vai romper todas as marcas. Consulta aquí toda a información sobre o entroido de Dumbría.
Un gran comparsa de disfraces percorrerá o domingo as rúas de Muros.
Todo dependerá da previsiónn metereolóxica para que Carballo celebre o seu multitudinario desfile de disfraces.
Continúa a I Festa da Cervexa Artesá Galega no recinto feiral de Santa Comba onde tamén haberá unha mostra de artesanía e concertos de rock. Pinchar aquí para ver o programa completo.
O "entruido" continúa en Mazaricos cun espectáculo cómico de teatro “Fair Play” na casa da Cultura da Picota. A cita, que está dirixida a todos os públicos, comeza ás 17 horas.
Despois do gran desfile do sábado, as actividades do entroido continúan o domingo en Fisterra con obradoiros infantís e o martes, concurso infantil e música en directo e os Cabezudos.
O pavillón de Ponteceso acolle o domingo o XXII desfile de disfraces.

Luns, 8 de febreiro: as citas do entroido

O centro comercial Finisterrae de Cee acolle a partir das 18 horas unha gran festa de disfraces na que haberá desfile, concurso, bailes e xogos para todos.
Moi ben traído o obradoiro de rosquillas e orellas que organiza a asociación cultural Adro de Baio. A actividade, dirixida para todos os públicos, será de 16 a 19 horas.

Martes, 9 de febreiro: as citas do entroido

Durante catro días haberá distintas actividades en Muxía para conmemorar o carnaval, máis o día grande é o martes co concurso de disfraces infantil e de adultos. Ademais de degustación de filloas e orellas e música a cargo de Manolo Delfín, o concello repartirá case 1.500€ en premios.
As filloas, e os disfraces, serán os principais protagonistas do concurso de entroido que organiza o concello de Zas. Repartiránse máis de 700€ en premios e durante toda a tarde os nenos e nenas poderán xogar nos inchables e participar nos obradoiros de maquillaxe.
En Camariñas aproveitan a festividade local para facer un gran concurso de minicomparsas e comparsas no pavillón municipal da vila. Será unha gran festa con moita animación, hinchables, palomitas e algodón de azúcar.
Cabana vivirá o martes o día grande do entroido cunha gran comparsa. A cita, que é no pavillón municipal, comeza ás 17 horas.
O pavillón de Corme celebra o Carnaval o martes día 9 cun gran baile de disfraces.
Os máis pequenos serán os protagonistas da Festa Infantil que o concello de Cee organiza na praza da Constitución.

Mércores, 10 de febreiro: as citas do entroido

Un dos protagonistas do entroido de Muros – Facundo – terá o seu propio día o mércores, 10 de febreiro. Éste será o día máis triste da festa, xa que ás 19 horas, terá lugar o enterro do Facundo no que estará acompañado por un bo séquito de viúvas.

Venres, 12 de febreiro: as citas do entroido

Laxe despide o entroido co querido Cayetano. O enterro será ás 19 horas e a Charanga "Los Tajados" darán as notas musicais do acto que terá lugar na praia da vila.
A casa da Cultura de Coristanco acolle unha Festa Infantil de Entroido na que haberá música, talleres, desfile e un sorteo de agasallos.

Sábado, 13 de febreiro: as citas do entroido

A raíña do entroido, a Mikaela, encherá de disfraces, música e moita diversión a vila de Buño. Consulta aquí o a programación do concello de Malpica para este entroido.
Outro dos puntos fortes do sábado 13 é Cee. Como é de costume, as comparsas desfilarán pola vila a partir das 16:30 horas e, ás 18 horas, irán para o pavillón onde se repartirán 4.500€ en premios.
Os veciños e veciñas de Baíñas - Vimianzo - celebran o sábado, 13 de febreiro, a festa de entroido. Ademais do tradicional concurso de disfraces, haberá xogos, música e comidas típicas do carnaval.
Fisterra despide o entroido coa Queima do Polbo que será ás 18 horas na praia da Riberia.
Camariñas fai o colofón final do entroido co Enterro da Sardiña. O velatorio será as 18:30 na Casa de Pedra e, dende alí, o séquito sairá cara a praza do Mercado onde será o funeral e inhumación da querida sardiña.
En Muxía, a Queima do Percebe poñerálle o punto e final ao entroido 2016.
Os mariores serán os protagonistas da Festa de Entroido da 3ª Idade que organiza o concello de Coristanco. A cita é na casa da Cultura entre as 18 e as 21 horas.