A Xunta autoriza o Parque Eólico de Catasol II en contra do pobo de Laxe e pendente da UE

09:40 29/12/17

Proxecto eólico Pena Forcada-Catasol II, situado en Laxe

Gañou Fenosa, como non podía ser doutro xeito, aos mariñeiros de Laxe. O polémico Parque Eólico de Pena Forcada-Catasol II, no val de Traba, vén de ser un dos primeiros autorizados pola Xunta (xunto co dos Montes de Abella, en Lugo). E iso que está sendo investigado, xunto co de Mouriños (en Cabana) pola UE por graves afecións ao patrimonio e ao medio natural, e por posibles infraccións relacionadas coa fragmentación múltiple dun só proxecto industrial.

Todo en contra do posicionamento do pobo de Laxe, unha vez que o Concello e as Asociación asinaron a declaración de Laxe como Concello libre de Eólicos.

Os dous proxectos (Laxe e Cabana) de Gas Natural Fenosa recibiron numerosas críticas e alegacións, aínda abertas, o que non impide á Xunta darlles a aprobación aproveitando a nova Lei de implantación industrial quere aprobar a súa tramitación canto antes sen agardar a coñecer o que opina a UE sobre a afeción a un espazo Rede Natura e a unha Zona de Especial Protección de Aves.

”Non hai ningún trámite suspensivo” e “sería fácil desmontalos ao ser só dous aereoxeneradores”, limitouse a dicir o presidente da Xunta, Feijoo.