O Goberno central confirma a cesión ao Concello da Casa do Mar de Camelle
Esta pasada mañá de luns tivo lugar a simbólica entrega das chaves da Casa do Mar de Camelle. A alcaldesa de Camariñas, Sandra Insua, recibía de mans do delegado do goberno Pedro Blanco, as chaves deste edificio que pasa a ser de titularidade municipal para que o Concello poida aproveitalo como centro social, como viña anunciando nos últimos anos.
A cesión do Ministerio de Inclusión ao Concello deste inmoble propiedade da Seguridade Social estenderase durante 20 anos, tempo no que o Concello poderá destinar estes 443 metros cadrados a distintas actividades, co condicionante de que sexan de uso público.
Destacaron a axilidade dos trámites, xa que esta cesión foi posible en 6 meses cando antes o proceso podía levar anos. Dende o goberno central animan ao resto de Concellos a utilizar esta nova posibilidade porque hai numerosos inmobles baleiros propiedade do Estado.
