Ademais das miles de prazas de aparcamento que hai na vía pública, incluídas as case cincocentas da zona azul, o Concello de Carballo ten a disposición da veciñanza 2.498 prazas para vehículos en 48 parcelas de uso gratuíto. A maioría están en soares particulares cedidos provisionalmente, pero xa son preto de catrocentas as situadas en terreos municipais, entre elas a maior bolsa que temos na vila: as 210 prazas do estacionamento situado entre a rúa Perú e a avenida Ponte da Pedra.

Comodato

O goberno municipal vén apostando nos últimos vinte anos pola utilización do sistema de comodato, que consiste na cesión ao Concello de fincas particulares a cambio da exención do IBI. A cesión é provisional, de xeito que as persoas propietarias poden solicitar en calquera momento a devolución do terreo, como xa ten ocorrido.

Nestes momentos, precisamente, estase a traballar na consecución e o acondicionamento de dous novos espazos para vehículos, un na contorna do CEIP Bergantiños e outro nas inmediacións da Praza do Concello.

De xeito paralelo, o Concello de Carballo está a levar a cabo o acondicionamento destes aparcadoiros, tanto no que se refire ao firme coma á limpeza.