A colaboración entre a Fundación Araguaney e o Concello de Carballo fai posible que por quinto ano poidamos recibir en Carballo un resumo da última edición da Semana de Cine Euroárabe Amal. Ten en Carballo unha das súas citas principais a proposta “Amal en ruta”, que espalla polo país o talento e a realiade dos países árabes.

Este ano o ciclo achega a Carballo, no marco do programa trimestral Cultura con Forza, 5 propostas, entre documentais e longametraxes baseadas en cinco historias reais. “Son co-producións entre distintos países”, explicou o presidente de honra da fundación Ghaleb Jaber, “nos que os árabes poñen as historias, e os europeos, a maquinaria, os medios para convertelas en cine. Iso quere dicir que podemos traballar xuntos”.

Galeb Jaber chamou a mirar máis alá das ideoloxías e das relixións, “porque detrás delas hai persoas, xente que come, que sofre...” e que “Amal en ruta” simboliza “a ilusión de facer chegar a esperanza a todo o mundo”, tamén a tantos países árabes onde non teñen a oportunidade de gozar de propostas culturais coma estas.

Programa

Proxectaranse tres ficcións e dous documentais no Pazo da Cultura e na Biblioteca Rego da Balsa ás 20:30 horas. A entrada é gratuíta ata completar o aforo:

Xoves 3 de febreiro: “Gods of Molenbeek (Aatos ja Amine)”

Longametraxe documental. Reetta Huhtanen/ 2019/ Finlandia, Bélxica e Alemaña/ 73 minutos.
O distrito de Molenbeek, en Bruxelas, ten fama de ser un dos epicentros do yihadismo europeo, pero para Aatos e o seu amigo Amine, é simplemente o seu fogar familiar. Xuntos buscan respostas ás grandes preguntas da vida, pero a brutalidade do mundo adulto irrompe cando os terroristas detonan unha bomba no barrio.

Gods of Molenbeek (aka Aatos ja Amine) official TRAILER from Zone2 Pictures on Vimeo.

Venres 4 de febreiro: “200 metros (200 METERS)”

Longametraxe de ficción. Ameen Nayfeh / Palestina, Xordania, Italia, Qatar e Suecia / 2020/ 93 minutos.
200 metros é a distancia que hai entre dúas localidades palestinas partidas polo muro de separación israelí, que separa a Mustafa da súa esposa e fillos. Unha distancia que parece insalvable ata que recibe a noticia de que o seu fillo está no hospital.

Xoves-10 de febreiro. “The reports on Sarah and Saleem” (Os informes sobre Sara e Saleem)

Longametraxe de ficción. Muayad Alayan / Palestina, Países Baixos (Holanda), Alemaña e México / 2018/ 127 minutos.
Drama, baseado en feitos reais, sobre a relación adúltera de Sarah, unha muller israelí que dirixe un café no oeste de Xerusalén, e Saleem, palestino de Xerusalén este que traballa como repartidor. Os seus cónxuxes vólvense conscientes dos enganos das súas parellas despois de que Saleem e Sarah peléxense en público, o que sitúa a Saleem no punto de mira das forzas de seguridade israelís.

Xoves 17 de febreiro: “The return: Life after ISIS” (O retorno: A vida despois do ISIS)

Documental. Alba Sotorra / España / 2021/ 90 minutos.
Narra a historia dun grupo de mulleres occidentais que dedicaron a súa mocidade ao ISIS, pero que agora queren ter a oportunidade de reconstruír as súas vidas en casa. O acceso exclusivo de Alba Sotorra, a directora, ao campo de Al-Roj no nordés de Siria móstranos a dura realidade dun grupo de mulleres atrapadas polo seu pasado como membros de ISIS.

Venres-18 de febreiro: “Gaza mon amour”.

Longametraxe de ficción. Tarzan Nasser e Arab Nasser / Francia, Alemaña, Portugal, Palestina e Qatar / 2020 / 87 minutos.
Gaza, na actualidade. Issa, un pescador de sesenta anos, está namorado de Siham, unha muller que traballa no mercado coa súa filla. Cando descobre unha antiga estatúa de Apolo nas súas redes de pesca, Issa escóndea, sen saber que este descubrimento cambiará a súa vida para sempre. Mentres, a súa confianza aumenta e decide achegarse a Siham.