O Ciclo de Cine Amal en Ruta achega a realidade do mundo árabe a Carballo
Hoxe, xoves 22 de febreiro, arrinca a sétima edición do ciclo de cine euroárabe “Amal en Ruta Carballo 2024”. Unha oportunidade única a que temos na comarca de disfrutar do cine árabe que nos brindan a Fundación Araguaney-Puente de Culturas e o Concello de Carballo. Os xoves e sábados, ás 20:30h, dende hoxe ata o 7 de marzo (con entrada de balde), teremos cita no Pazo da Cultura, achegándonos a posibilidade de ver 5 producións de gran recoñecemento en festivais internacionais de cine.
Esta edición está marcada pola actualidade, polos últimos acontecementos acontecidos no mundo árabe. Baixo o lema “NINGUÉN ESTÁ SEGURO”, e cunha imaxe negra sombría, rende homenaxe ás persoas falecidas na traxedia do terremoto de Marrocos, que sacudiu o país o pasado 8 de setembro co seu epicentro na cidade de Ighil e que deixou detrás de miles e miles de vítimas; igual que aconteceu na cidade libia de Derna, onde a auga destruíu todo o que estaba ao seu paso, incluídas innumerables vidas humanas.
E un mes despois, en outubro, Ghaleb Jaber Martínez lembra que as bombas foron e seguen a destruír os soños "do pobo sempre esquecido de Palestina". "Ninguén está a salvo, todos estamos en perigo, independentemente do lugar do mundo onde nacemos, enfrontándonos a perigos como o cambio climático, o extremismo ou o capitalismo salvaxe", dixo Jaber Martínez.
Jaber Martínez afirmou que o festival AMAL, que xa cumpre 21 anos, e a mostra Amal en Ruta, que xa cumpre 7 anos en Carballo, son algo máis que un evento cinematográfico, son un “encontro de culturas, un espazo no que a gran pantalla convértese nunha fiestra e esa fiestra abre unha porta ao intercambio, a empatía e a comprensión”.
Evencio Ferrero agradeceu á Fundación Araguaney a organización do ciclo que axuda a manter a conexión co mundo. “O compromiso da sociedade galega debe estar co mundo árabe para comprender a realidade, saber interpretala e reaccionar contra o xenocidio ao que estamos asistindo. Podemos expresarnos na rúa, como o estamos facendo, e tamén a través da co-creación, neste caso a través do cinema. Este é un ciclo para saber o que se nos oculta, porque se nos oculta todo, e para deixar de saber. "A sociedade debe reaccionar contra o xenocidio", dixo.
Pola súa banda, Maruxa Suárez comentou a boa acollida que ano tras ano ten Amal na Ruta e mesmo destacou que “hai xente que vén expresamente”. Ademais, apuntou que esta serie de películas mostra "a necesidade de mirar, máis que nunca, a Oriente Medio”.
- A primeira sesión será hoxe xoves 22 de febreiro coa película “Entre las higueras”;
- O sábado 24 proxectarase a ficción “Conspiración no Cairo”;
- O xoves 29 será a quenda da película “O sabio”;
- O sábado 2 de marzo poderase ver a ficción “O caftán azul”;
- A última sesión será o xoves, 7 de marzo, co documental “Little Palestine, Diary of a Siege”.
