Presentou onte o Concello de Carballo a nova edición estival do proxecto Derrubando muros con pintura. Un proxecto que está convertindo dende 2013 a vila nun museo a ceo aberto, e que este verán terá 4 novos edificios convertidos en lenzos. Catro artistas intervirán noutros tantos espazos urbanos do 12 ao 22 de agosto, nunha edición na que tamén haberá obradoiros, faladoiros e música.

As artistas invitadas, todas da vila menores de 25 anos, son Isa Bermúdez, Nere Rama, Nazaret e Tucho. Irán pintando na rúa Xasmíns, na traseira da Ludoteca Municipal, na rúa Igrexa (zona do aparcamento do San Martiño) e na traseira do auditorio do IES Alfredo Brañas.

Durante a presentación Xosé Regueira declarouse “encantado” de poder contar con esta “nova fornada de talento e creatividade local”, que achegará un estilo diferente aos muros carballeses. “Derrubando muros é o recurso máis demandado polas persoas que nos visitan _destacou o concelleiro_. Hoxe mesmo chamaron de Zaragoza para poder vir ver os nosos murais na súa visita a Galicia e seguramente poderán ver tamén aos nosos artistas pintar en directo”.
Ao “potencial” da mocidade carballesa tamén se referiron Maruxa Suárez e Evencio Ferrero.

Actividades

O día 14 de agosto está previsto abrir oficialmente a programación cunha cita no palco da rúa Jacinto Amigo Lera. Así, haberá un faladoiro e coloquio arredor da arte urbana que se completa cun recital poético con aires rocanroleiros no que estarán a escritora carballesa Rosalía Fernández Rial e Mr. Kilombo.

Os obradoiros serán:

• Obradoiro de rotulación: xoves 19 de agosto de 10.00 a 13.30 h. nun escaparate do Mercado Municipal. Para maiores de 16 anos. Aforo máximo: 8 persoas.
• Obradoiro de pintura para a rapazada: domingo 22 de agosto de 10.00 a 13.00 h. As nenas e nenos que participen terán a oportunidade de pintar un novo mural na rúa Bos Aires coa axuda dos e das artistas. Para nenas e nenos de 6 a 11 anos. Aforo máximo: 10 participantes.

Ademais, o día 22 celebrarase unha ruta guiada polas novas obras de arte urbana e unha cita sorpresa xa cara á noitiña.

Artigos relacionados

• Profesionalizando o muralismo.

Novas do Rexenera

• Xuño 21: “O Rexenera Fest fai Carballo máis camiñable e agradable de pasear”.
• Maio 21: O Rexenera Fest, a mellor vacina contra o feísmo.
• Rexenera 20: Xosé Regueira, sobre o Rexenera Fest: "Necesitabamos osixenar a mente e a cultura é a mellor maneira de facelo”.
• Rexenera 2019: Así son os novos murais que enchen a Carballo de máis cor.
• 2019: A arte urbana segue reinventando a Carballo.
• Rexenera 2018: Carballo suma cinco novas obras de arte á súa galería ao aire libre.
• Rexenera 2017: O Rexenera Fest enche de cor as fachadas de Carballo
• Rexenera 2017: Carballo convírtese no referente en arte urbana co Rexenera Fest
• Rexenera 2016: Carballo convírtese no referente en arte urbana co Rexenera Fest.
• Rexenera 2015: Carballo, de exemplo de feismo urbanístico a gran museo ao aire libre.