Dous bañistas tiveron que ser rescatados polos socorristas esta pasada tarde de xoves 13 de xullo na praia de Razo, en Carballo.

O primeiro dos sucesos tivo lugar ás 18,30 horas, cando un particular contactou co 112 para pedir axuda e indicou que estaba na praia, cara á zona de Baldaio, e vía como unha persoa pedía axuda desde a auga.
No transcurso da comunicación, outro alertante informaba de que un home pedía axuda na praia, entre Baldaio e Razo, a uns 500 metros da area.

Ante iso, o 112 contactou cos socorristas do areal, cos efectivos de Protección Civil e coa Garda Civil, ademais de pór os feitos en coñecemento dos servizos sanitarios. Tamén se informou ao persoal de Salvamento e ao Servizo de Garda Costas de Galicia, así como á Policía Local.

Os socorristas tiveron que multiplicarse e tras rescatar a unha das persoas, que estaba insconsciente, e a atendían no posto, tiñan que sacar a outra da auga.

O primeiro bañista foi trasladado en ambulancia mentres que a segunda tivo que se evacuada no helicóptero medicalizado de Santiago, que aparcou na pista que hai ao carón do campo de fútbol.