A Autovía Costa da Morte, a segunda menos utilizada de toda Galicia

A Autovía Costa da Morte, a segunda menos utilizada de toda Galicia

08:29 15/05/18

Imaxe da Autovía Costa da Morte, días antes de ser inaugurada en xullo de 2016, pero que podería ser cazada co mesmo tráfico calquera día de 2017

Fundamental para o desenvolvemento económico dunha comarca illada historicamente, pero non tan revolucionaria como puiderámos pensar hai 10 anos. Pode ser esta unha lectura dos datos que vén de facer públicos a Xunta na súa Memoria do Tráfico en Galicia 2017 sobre a Autovía Costa da Morte.

Uns datos que sitúan a Autovía como a segunda menos utilizada de Galicia (por dianteda Ourense-Celanova) e que devolven un panorama desolador sobre o despoboamento que vive a bisbarra.

Xa había quen en 2014 lamentaba o esforzo realizado arredor desta aUtopía pantasma. Unha infraestrutura non exenta de numerosas polémicas, da que se inauguraba só o 35% do prometido en 2016, con nada menos que 13 anos de retraso, con continuas mentiras sobre a súa apertura e sobre os polémicos procesos de adxudicacións.

Análise do tráfico na AG-55

Se de Coruña a Carballo hai unha media de 14.000 vehículos diarios pagando a primeira das peaxes, dende Laracha ata Carballo a media de vehículos xa baixa a 11.000. A circunvalación carballesa é utilizada por 9.300 coches cada día.

Chama a atención que o número de vehículos que utiliza a comarcal AC-552 entre Coruña e Carballo é semellante á da Autopista, o que demostra a imperiosa necesidade de eliminar as peaxes da AG-55.

Datos do novo treito Carballo-Baio

O novo tramo é utilizado por un máximo de 7.300 vehículos diarios, os que se rexistran entre Carballo e Coristanco. Unh acifra que en agosto pode chegaraos 9.000 pero que en febreiro baixa ata os 6.200.

Se seguimos baixando cara a Costa, as cifras van descendendo. Entre 6.000 e 7.000 utilizan a AG-55 entre Coristanco e Baio, e tan só 4.600 usuarios utilizan o Corredor entre Baio e Berdoias diariamente. Un dato que é dos verdadeiramente chamativos, pois hai 10 anos, en 2008, eran case 8.000 os vehículos que facían o treito Baio-Vimianzo todos os días pola AC-552.

A apertura do treito ata Baio si que produxo unha baixada na comarcal entre Coristanco e Agualada (de 10.000-15.000 a 1.500-3.000) e máis acentuada aínda no treito Agualada-Baio por onde pasan menos de 1.500 vehículos ao día.

Un 30% de desprazamentos menos que en 2008

Sumando estes datos (a cifra de vehículos que pasaban en 2008 pola AC-552 entre Vimianzo e Baio e os vehículos que suman a AC-552 e a AG-55 entre os mesmos puntosen 2017), podemos concluír que entre 2008 e 2017 hai unha baixada do 30% de desprazamentos diarios polo corazón da Costa da Morte.

Outras zonas máis densas

Se baixamos ata a comarca de Fisterra, a AC-442 rexistra entre Cee e Dumbría máis de 9.600 desprazamentos diarios, moi por diante do vial VG-14 que une Cee e Sardiñeiro (entre 1.500 e 3.000) e a estrada entre Corcubión e Sardiñeiro (menos de 1.500). Chegan a FIsterra cada día uns 4.000 vehículos diarios.

Outra das zonas máis densas da comarca é a vía “rápida” AC-415 que une Carballo e Buño, con 8.500 vehículos diarios.

Peaxe na sombra

Moitos colectivos denuncian que a concesión conleva unha “peaxe na sombra”, pois a concesión significa un custe ás arcas da Xunta de 23 millóns de euros anuais.