O vindeiro sábado, 16 de abril, ás 17 horas terá lugar no local comarcal do BNG - situado na avenida Simón Tomé Santos de Corcubión - o Proceso Adiante do BNG co fin de que a cidadanía en xeral, e a mocidade en particular, participe no proceso de refundacióndo partido. Mazaricos acollerá o domingo 17 de abril, de 12 a 13 horas, este encontro. O obxectivo do Proceso Adiante é relanzar o proxecto nacionalista para, no prazo máximo dun ano, poñer a punto o proxecto político con tres grandes obxectivos. "O primeiro, actualizar o discurso do bloque nun momento en que consideramos que o nacionalismo é máis necesario que nunca"; indica a portavoz nacional Ana Pontón que xa visitou a Costa da Morte en dúas ocasións desde que firmou o seu cargo. "O segundo obxectivo do Proceso Adiante é recuperar o pulso social e electoral para que o BNG sexa peza clave na derrota do PP e, en terceiro lugar, ensanchar a base social do nacionalismo", asegura a líder nacionalista. “O Proceso Adiante determinará que aspectos temos que corrixir e mellorar para ofrecer ao conxunto da sociedade galega un proxecto nacionalista renovado, reforzado que aspire absolutamente a todo”, salientou Rubén Cela en nome da Executiva nacional, un proceso participativo e transparente ao que tamén se incorporen “homes e mulleres que sen militar no BNG comparten que Galiza precisa un proxecto nacionalista forte”. “Queremos dar cabida a todas as persoas que se sintan nacionalistas ou crean que Galiza precisa forzas políticas propias para plantar cara aos desafíos que temos e superar a crise na que levamos moito tempo”, explicaba Pontón. Novas relacionadas

• Ana Pontón visita Carballo tralas inundacións
• Ana Pontón, a nova portavoz do BNG, visita Fisterra
• Manuel Antelo asegura que “o BNG desprazouse deixando fóra a moita xente”

Fonte

• Redacción QPC ([email protected])
• BNG