Domingo. 17.10.2021
El tiempo

"Animo a acudir á Semana Sen Fronteiras a todas aquelas persoas que teñan inquedanzas de cambio e de transformación social"

"Animo a acudir á Semana Sen Fronteiras a todas aquelas persoas que teñan inquedanzas de cambio e de transformación social"
Nerea González A carballesa Nerea González López (Carballo, 1991) é psicóloga na ONG Ecos do Sur da Coruña desde o ano 2016, entidade que acaba de ser premiada polos seus métodos innovadores para combater o racismo e que mañá participará na Semana Sen Fronteiras de Carballo, un ambicioso proxecto creado polo Casino 1889 para falar durante unha semana da realidade das persoas migrantes en todo o mundo, así coma dos dereitos humanos. Para Nerea é fundamental "xerar narrativas alternativas, un discurso propio que mobilice a esa gran parte da poboación que non opina, non participa, non toma parte dun discurso e non responde ante situacións de vulnerabilidade dos dereitos". Falamos máis polo miúdo con ela.
  • QPC: Mañá mércores Ecos do Sur chega á capital de Bergantiños para falar sobre o ‘Odio na rede’. Cales son as ferramentas para aprender a combater esa aversión sobre a migración que impera nas redes sociais?
Os procesos mais importantes de transformación social sempre acontecen na Educación. É fundamental transmitir valores neste ámbito, valores que defendan a igualdade e a equidade e non promover espazos de competitividade, porque iso xera unha sociedade competitiva e non fomenta o pensamento crítico. É fundamental xerar narrativas alternativas, un discurso propio que mobilice a gran parte da poboación que non opina, non participa, non toma parte dun discurso e non responde ante situacións de vulnerabilidade de dereitos. Facernos conscientes e ampliar o marco do que se entende por un dereito como seres humanos, independentemente da túa orixe. Nós, dentro do noso proxecto CibeRespect, desenvolvemos obradoiros sobre ciberactivismo contra o discurso de odio, fact cheking, construción de narrativas alternativas, todo isto enfocado a alentar a acción das persoas que cren nunha sociedade igualitaria e diversa, pero que ata o momento non interveñen ante o odio online porque non saben como facelo ou porque se senten soas ante ese desafío. A nosa tarefa é facilitarlles ferramentas, calquera persoa pode contactar con nós e sumarse á iniciativa!  
Vivimos nunha sociedade dividida, que se alimenta por un sistema que se move pola visión individualista fronte á colectiva
  • QPC: Precisamente a ONG na que traballas acaba de ser premiada polos seus métodos para combater o racismo. Somos unha sociedade racista?
Vivimos nunha sociedade dividida, que se alimenta por un sistema que se move pola visión individualista fronte á colectiva, é dicir, na nosa sociedade, e sobre todo despois da crise, acentuáronse procesos e rasgos racistas. Entendemos a liberdade como algo individual e non colectivo. Percibimos as diferencias individuais por encima dos dereitos colectivos. Hai que asumir que as persoas temos ideas preconcebidas sobre determinados colectivos e temos que ser conscientes delas. Que se utilizan no día a día. Os racismos cotiás. Estereotipos que non axudan á inclusión senón que nos separan. Finalmente, estes estereotipos acaban en prácticas cotiás de normalizar determinadas vulneracións de dereitos. Por exemplo: “Eu penso que as mulleres latinoamericanas veñen a España a quitarnos o traballo”, polo que non vou a facer nada para evitar este tipo de comentarios ou situacións de vulneración de dereitos. Ou como consecuencia, non vou contratar a unha muller latinoamericana, aínda que sexa a mellor cualificada para un posto de traballo.
  • QPC: Neste sentido, o principal lema da Semana Sen Fronteiras é amosar a información das persoas migrantes que os medios moitas veces ocultan ou manipulan. A rede de ciberactivistas que propoñedes no voso método axudará a combater isto?
Si. Pode dar visibilidade a outras realidades e unha visión non discriminatoria da realidade, e espallala polas redes sociais para contrarrestar o efecto do discurso de odio. Tamén axudará en procesos de Educación en discursos alternativos e en consumo crítico de información. As persoas temos o potencial de cambiar a nosa realidade. Estamos inundados de desinformación impulsada por grupos organizados que nos trasladan a súa visión da realidade, porque a realidade constrúese mediante a linguaxe, que nos cala e mediatiza. É importante responsabilizarnos e darnos conta de que temos un papel no cambio social, e que hoxe, a loita polos Dereitos Humanos e pola democracia é en grande parte unha loita discursiva que se desenvolve nas redes sociais.
  • QPC: Ecos do Sur traballa coas persoas en risco de exclusión social. En que consiste a vosa axuda?
Si, atendemos a persoas inmigrantes e emigrantes retornadas, en situación administrativa regular ou irregular. Refuxiadas, desprazadas ou solicitantes de asilo. Persoas desempregadas de longa duración. Ademais, temos dispositivos específicos para mulleres, atendendo a tripla discriminación que sofren as mulleres migrantes: por ser muller (cuestións de xénero), migrante (racismo) e traballadora (dificultades no acceso e mantemento ao emprego - brecha de xénero, teito de cristal, segregación horizontal e vertical). E atendemos a mulleres que pasan por situacións de vulnerabilidade como vítimas de trata e/ou explotación sexual, a violencia de xénero e procesos de precariedade laboral, como as empregadas do fogar (un sector profundamente feminizado e precarizado - mais do 30% das empregadas do fogar non teñen contrato). Traballamos desde unha perspectiva integral que comprende ás persoas na súa globalidade, atendendo aos seus aspectos emocionais, económicos, sociais, culturais, etc. Para iso, durante os 27 anos de existencia da entidade, plantexámonos tres retos: 1. Garantir que todas as persoas teñan información e acceso igualitario aos seus dereitos, independentemente da situación administrativa, económica ou social na que se atopen; 2. Formación, emprego e emprendemento. O traballo é unha base de realización social, económica e persoal. Por iso, construímos un sistema de capacitación e acceso ao emprego baseado na equidade de oportunidades e de opcións; 3. Activación social para a cidadanía global para promover a participación desde a interculturalidade, o coñecemento mutuo e a superación de prexuízos, cimentando comunidades abertas e orgullosas da súa diversidade. Así,  as principais accións que desenvolvemos son: Educación para o Desenvolvemento, Sensibilización, Participación Cidadá, Cohesión Comunitaria, Fortalecemento de Asociacións e Voluntariado.
  •  QPC: E ti, coma psicóloga, en que se centra o teu traballo principalmente ?
A perspectiva psicolóxica na entidade traballase de forma transversal nas tres áreas principais de actividade. Somos dous compañeiros psicólogos que, cun traballo de equipo multidisciplicar, acompañamos os casos de maneira individual e colectiva. O noso papel fundamental está nun sentido amplo da psicoloxía e da intervención social, desenvolvendo fundamentalmente actividades grupais para o crecemento persoal e social.  
Todos temos dereito a transformarnos, a crecer e a construír a nosa identidade colectiva
  • QPC: A Semana Sen Fronteiras é unha actividade pouco común, para a que non adoita haber moita cabida e menos en vilas como poder ser Carballo... Porque animarías á xente a asistir?
Animo a acudir a esta Semana Sen Fronteiras a todas aquelas persoas que teñen inquietudes de cambio e de transformación social. A aquelas ás que lles faltan ás veces os argumentos para expresar aquelo que senten. As persoas que queren comprender o que nos ocorre diariamente. A aquelas persoas que precisan contextualizar o que ven nos medios de comunicación. A aquelas que cren na xustiza social e na igualdade de dereitos. Nun momento de globalización e globalidades diversas é preciso recordar que somos persoas en movemento, e que nese movemento construímonos como persoas. Todos temos dereito a transformarnos, a crecer e a construír a nosa identidade colectiva. https://quepasanacosta.gal/a-semana-sen-fronteiras-xorde-para-dar-a-informacion-sobre-as-persoas-migrantes-que-os-medios-moitas-veces-ocultan-ou-manipulan/

comentarios