As vespas velutinas mudan o seu "modus operandi"

08:10 25/07/18

Esta semana, o servizo municipal de pragas de Carballo recibiu o 1º aviso da tempada a aparición dun niño secundario de avespa asiática Co primeiro aviso da temporada pola aparición dun niño secundario de avespa asiática, o servizo de control de pragas do concello de Carballo decidiu - coa colaboración dos propietarios da casa onde apareceu - non retirar o niño que polo momento é pequeno pero que en poucos días aumentará considerablemente o seu tamaño. E precisamente non o retiran para ver a súa evolución e poder estudar o comportamento das avespas. De feito, segundo os profesionais do servizo, este ano as velutinas están a cambiar o seu "modus operandi". Por unha banda, as raíñas fixeron os niños primarios en lugares moito menos seleccionados que ata agora. “Xa non aparecen tanto en cornixas ou alpendres senón que os atopamos en calquera sitio: nunha pedra, nun valado...”, explica Isidro Rodríguez, responsable do control de pragas. Semella que moitos niños aparecen no mesmo lugar onde as raíñas pasaron o inverno e que os secundarios están a construírse onde o ano pasado aparecían os primarios. Pero como non hai datos fiables ao respecto, de aí o interese por estudar a evolución deste primeiro niño secundario. O feito de que as avespas aniñen en calquera sitio incrementa, por outra banda, o risco de picaduras. Neste sentido, desde o servizo municipal de control de pragas de Carballo fai un chamamento á precaución das persoas que traballan no campo ou no monte para que inspeccionen o lugar antes de poñerse mans á obra por se existe algún niño e tamén a observar se hai avespas voando pola zona, porque iso indicará que o niño está preto. Dende o concello de Carballo sinalan que neste mes de xullo incrementouse notablemente a presenza de avespas. Fronte aos 18 niños primarios localizados entre maio e xuño (9 cada mes), no que vai de xullo van 41. Aínda así, as cifras seguen moi lonxe do ano pasado, no que a estas alturas do ano xa se retiraran máis de 150 niños. Asimesmo, recordan que as persoas que localicen algún poden dar aviso ao 112 ou ao 012. Este ano, foron varios os municipios da zona os que destinaron unha parte dos seus orzamentos a loitar contra esta praga. As actuacións leváronse a cabo durante os meses de abril e maio en concellos como o de Carballo e Zas obtendo bos resultados en canto á captura de raíñas o cal fixo que desencendera considerablemente a súa presenza en zonas que adoitaban frecuentar.