A candidatura da Costa da Morte como Reserva Mundial de Surf entra na segunda fase

Reunion da segunda fase da candidatura da Reserva Mundial de Surf da Costa da Morte — Primeira reunión desta segunda fase da candidatura da Reserva Mundial de Surf da Costa da Morte

10:01 25/10/19

Despois dunha completa primeira fase na que se conseguíu cumprir cos requisitos establecidos por Save the Waves, continúa o proceso para acadar que a Costa da Morte sexa a primeira zona do Estado, e segunda de Europa, en convertirse en Reserva Mundial de Surf.

Esta semana comezou a segunda fasse da candidatura, baixo o amparo da Deputación da Coruña, e coa colaboración intrínseca dos Concellos. De feito, tócalles mover ficha, e terán que declarar o territorio Reserva Local de Surf e promover a sensibilización social sobre os valores naturais e o propio deporte.

Asistiron á reunión representantes políticos dos concellos de Fisterra, Laxe, Malpica, Carballo e A Laracha, e membros da comisión operativa da iniciativa, para afrontar agora á fase definitiva do proceso para o que conta cun dos seus principais activos: a implicación de máis de 30 representantes tanto de institucións como de entidades privadas traballan conxuntamente para que o obxectivo se faga realidade.

A entidade Save the Waves, que é quen decide sobre as candidaturas presentadas, require agora a presentación dun proxecto polo miúdo antes do fin do ano, no que xa se está traballando, mais tamén estudar as formas para dar viabilidade a curto e longo prazo para contribuír ao desenvolvemento da Costa da Morte como destino sustentábel de surf, o que foi o principal obxectivo da xuntanza celebrada en Carballo.