O servizo de control de pragas de Carballo retirou 380 niños de vespa velutina no que vai de ano

Costa da Morte carballo

08:15 03/10/17

O servizo de control de pragas retirou 89 niños en Carballo durante o pasado mes de setembro Ao longo do mes de setembro, o servizo municipal de control de pragas de Carballo retirou un total de 89 niños de vespa velutina repartidos no conxunto das 18 parroquias que forman o concello. As máis afectadas foron Carballo e Sofán, con 19 e 18, respectivamente, mentres que de Aldemunde e Cances só se recibiu un aviso. Ainda así a cifra de avisos descendeu con respecto ao mes de agosto. Nestes nove meses do ano elimináronse xa en Carballo 380 niños, que superan con creces os 249 retirados en todo o 2016. Carballo é o único concello de Galicia que ten contratado un servizo específico para o control e a retirada dos niños de velutina, e o prazo de resposta non excede das 24 horas. Malia a campaña de trampeo que se levou a cabo na primavera, no verán disparouse a aparición de colmeas, tal como prevían os apicultores locais, que están a traballar estreitamente coa empresa concesionaria. As vespas utilizan, principalmente, árbores de todo tipo para facer os seus niños, pero tamén frecuentan as zonas urbanas para construílos en tellados, terrazas, balcóns ou alpendres. Aínda que estes son os emprazamentos máis frecuentes, en setembro, como curiosidades, foron eliminados niños dun pé de millo e unha alacena. As persoas que localicen un niño poden chamar ao 012 ou ao 112, dende onde se poñerán en contacto coa empresa concesionaria para que proceda á súa retirada.