Non hai moito centraban a súa actividade en Coristanco para unha sentida homenaxe. Pero a loita dos emigrantes retornados contra a estafa de Facenda coa problemática da tributación das nosas pensións percibidas no estranxeiro, continúa. De feito, onte mantiveron unha reunión Delegada da Axencia Tributaria para Galicia, na que a Coordinadora Nacional de Plataformas de Emigrantes Retornados trasladoulle unha serie de peticións:

• ”Que non imos consentir que se lle dea unha solución simplemente cosmética ao noso contencioso coa Axencia Tributaria por atopármonos nas vésperas dun ano de importantes envites electorais”.
• ”Os e as emigrantes retornadas non renunciaremos a que se modifique a lei 35/2006 para que as pensións das persoas retornadas tributen igual que a do resto dos galegos. Concretamente o artigo 96 en relación co 17, de tal forma que se estableza a obriga de declarar a partir de 22.000 euros ano de ingresos e que para os restantes se estableza un réxime de retencións idéntico ao do resto dos e das pensionistas”.
• ”Que tendo en conta que moitos emigrantes retornados para teren dereito á prestación sanitaria teñen que ou pagar no país de orixe un seguro ou establecer un convenio coa seguridade social española ( arredor de 90 €/mes) que estas cantidades se poidan incluír como gastos deducibles no IRPF, igual que xa ocorre cos gastos de seguridade social dos e das traballadoras”.

Cambios na modificación legal

Hai cambios que para a Coordinadora son esenciais na proposta de modificación legal remitida ás Cortes Xerais en relación coas pensións dos e das emigrantes retornadas:

• ”Modificar o texto remitido ás Cortes no sentido de que en ningún caso a obriga de presentar declaración do IRPF se aplique con carácter retroactivo. Polo tanto que o período de regularización só afecte a partir deste ano.”
• ”Aclaración sobre como se vai realizar a devolución ás persoas que xa foron requiridas e que aboaron sancións e intereses: trámites a realizar. Do mesmo xeito que nos sancionaron e ameazaron con embargos de oficio, tamén de oficio deberán devolvernos os nosos cartos.”

Tratamento comunicativo

E finalmente tamén lle fixeron ver que existen importantes lagoas na actuación da Axencia Tributaria que poden dar lugar a un trato discriminatorio aos emigrantes retornados e mesmo provocar que se vexan obrigados a tributar sen teren que facelo:

• ”Informar a todas as persoas afectadas e que se indique quen ten obriga de incluír as pensións na declaración tendo en conta: país de procedencia das pensións, as sentenzas existentes, as resolucións do Tribunal Económico Administrativo e os cambios dos últimos anos nos diferentes convenios bilaterais.”
• ”Solicitar información dos países de procedencia das pensións, sobre todo Suíza, para verificar que prestacións xa están sometidas a gravame no país de orixe para evitar a dobre imposición. (Hai persoas que por determinadas cantidades xa tributan no país de orixe malia o cal a AT lles reclama a súa inclusión na declaración).”
• ”Pensións por incapacidade. Recoñecer de oficio o recoñecemento das invalideces realizadas nos países de procedencia coa finalidade de acreditar a exención na tributación de ditas pensión. (Actualmente hai persoas con incapacidade total no país de orixe, que segundo o INSS é equiparábel á absoluta, que están sendo requiridas pola AT para a súa tributación) Os e as emigrantes retornadas non abandonaremos as nosas reivindicacións e mobilizacións até conseguir os obxectivos que consideramos de xustiza.”

Novas relacionadas

• Estalido de paixón e rabia dos Emigrantes Retornados.
• Os emigrantes retornados renderon homenaxe en Coristanco á primeira vítima da estafa de Facenda.
• Emigrantes Retornados de toda Galicia renderán homenaxe en Coristanco á primeira martir da Reforma das pensións.
• 24-04-14: Os emigrantes retornados da Costa da Morte tamén protestaron no Parlamento.
• 17-02-14: Emigrantes retornados saen de novo á rúa defendendo os seus aforros.
• 29-10-14: Os emigrantes retornados tamén se manifestan nas rúas de Cee.
• Cee analizou o drama das pensións.
• A cidadanía toma as rúas da Costa da Morte en clave de protesta.
• De oficina en oficina berrando polos meus aforros.

Fonte

• Redacción de QPC ([email protected]).