O Pazo da Cultura acolle mañá mércores, ás 11 horas, a presentación do programa da Semana do Libro e a Lectura que se desenvolverá do 24 ao 28 deste mes no Pazo da Cultura, en colaboración, un ano máis, coa asociación Socio-Pedagóxica Galega. Pero ademais desta iniciativa, xa consolidada e que inclúe diferentes actividades orientadas sobre todo ao público infantil, este ano celebrarase unha semana dedicada ao libro e á lectura para adultos na Biblioteca Rego da Balsa, con catro presentacións literarias. A primeira será hoxe ás 19:30 horas. Será o malpicán Xelucho Abella o que visite a biblioteca de Carballo ás 19:30 horas para falar de Fuxiron por mar, un libro no que recolle as historias de “Ciudad de Montevideo”, “San Adrián” e “Rocío”, tres motoras da vila malpicá que fuxiron para Francia durante a Guerra Civil cun total de 66 homes a bordo, e que na súa dura travesía tiveron que enfrontarse a temibles galernas ata arribaren á Bretaña francesa. Mañá mércores será a quenda do lugués Manuel Núñez Singala, o autor convidado a esta semana literaria, que presentará "Sacar a lingua é de mala educación", un interesante volume no que, de maneira sinxela e clara, expón os motivos polos que todos os habitantes de Galicia deberían ser competentes nas e oficiais da comunidade e aproveitar esa destreza como trampolín para adquirir outras o antes posible. Será tamén ás 19:30 horas. O venres 21 descubriranse os misterios que garda Proyecto Exitium Z, o libro do autor carballés Fernando Cabeza, que estará na Biblioteca Rego da Balsa a partir das 20 horas. O protagonista da súa obra é Juan, un mozo carballés que se converte en testemuño de como a liberación dun virus desencadea unha pandemia mundial e supón unha seria ameaza para o planeta. E de pechar a semana do libro encargarase outra carballesa, Rosalía Fernández Rial, que visitará a biblioteca o sábado á 12 horas para presentar Aulas sen paredes, un estudo teórico-práctico derivado da súa tese doutoral sobre o uso da expresión dramática e teatral como ferramentas pedagóxicas para as aulas de linguas. Todas as presentacións son abertas. Novas relacionadas

• A biblioteca Rego da Balsa de Carballo oferta trinta novas actividades
• Seis concertos e un monográfico sobre Bob Dylan enchen de música o Curruncho Pop da biblioteca Rego da Balsa
• A biblioteca Rego da Balsa xa ten o seu “curruncho pop”
• Chicharrón estrea mañá en Carballo o seu segundo disco “Postal”
• Catro artistas da Costa da Morte expoñen as súas obras en Carballo
• Vinte venres para cargar a batería cultural
• Manolo Rivas, contacontos, faladoiros e documentais enchen de actividade a biblioteca Rego da Balsa
• A biblioteca Rego da Balsa celebra o seu primeiro aniversario
• #ABiblioPréstame.
• O edificio dos 100 actos.
• Bergantiños á vangarda tecnolóxica galega.

Fonte

• Redacción QPC (info@quepasanacosta.com)
• Concello de Carballo