Xullo chega ao ecuador cunha #Axenda cargada de festas. Son moitas as parroquias da Costa da Morte que honran esta fin de semana á patrona dos mariñeiros, a Virxe do Carme. As procesións marítimas serán así as protagonistas de mañá en vilas como Camariñas ou Corcubión. Mais o "Carme" celébrase tamén en outras vilas máis do interior. O mellor de todo é que segundo indica o parte meteorolóxico de 4gotas.com esta será a fin de semana máis calorosa do que vai de ano. Así que os amantes da praia están de noraboa. O anticiclón e a estabilidade darán paso a varios días de tempo seco e moi solleiro. O certo é que non só estará o ceo azul na zona da Costa da Morte, se non en toda Galicia. Será claramente unha fin de semana para visitar calquera praia galega. O máis destacado, con todo, será a sensación de calor porque as máximas seguirán a subir polo menos ata o domingo. Hoxe os mercurios rozarán os 27º en Laxe ou os 28º en Carballo e Cee mentras que mañá e o domingo as máximas subirán ata os  30º e 31º respectivamente. O vento do nordés soprará con intensidade toda a fin de semana e será o unico que arrefriará lixeiramente o ambiente; haberá que telo moi en conta, sen dúbida, á hora de escoller un areal protexido desa dirección do vento ou haberá que aturar a area batendo cotra a pel. Festas

• Dende hoxe e ata o domingo, Zas celebra as festas do Carmen. A verbena comeza hoxe coa orquesta New York e a disco móbil CDC. O día grande, mañá sábado, non faltarán os pasarrúas, misas, procesión e sesión vermú coa orquesta Palladium que comparte escenario á noite con Tekila. O domingo, ademais dos actos relixiosos, a orquesta Solara encargarase de amenizar os bailes da misa e a verbena.
• Camariñas celebra dende hoxe e ata o luns as esperadas Festas do Carmen. Pola vila do encaixe pasarán orquestas como a Panorama, París de Noia, Olympus, Combo Dominicano, Marbella, Costa Oeste, o grupo Bomba, entre outros. Dentro dos actos litúrxicos, o de maior atracción será o sábado coa procesión mariñeira e a posterior danza de arcos.
• Corcubión honra mañá á virxe do Carmen. A orquesta Essencia a disco móbil CDC encargaranse da parte musical. Tampouco faltará a procesión marítima que será xusto despois da misa solmenne (ás 11 horas).
• Rapa das Bestas en Vimianzo. O campo de A Areosa acolle este domingo a tradicional rapa das bestas. A festa xa comeza mañá e continuara durante o domingo todo o día cun xantar incluido.
• Carme do Briño de Borneiro (Cabana). O domingo á tarde comenza en Borneiro as festas do Carme do Briño. Unha churrascada e unha foliada na que participan unha boa parte dos gaiterios da bisbarra daranlle comezo a dous días de festa. Xa o luns e o martes, os actos litúrxicos e os ritmos das orquestas tomarán protagonismo.
• Na parroquia de Maroñas (Mazaricos) estarán de festas o luns e o martes. O primeiro día, as orquestas Xacobeo e América encargaranse da parte musical. O martes o éxito de público está asegurado co Combo Dominicano e a orquesta Panorama.

Carrilanas de Esteiro

• Esta fin de semana Esteiro (Muros) celebra as súas festas na honra de Santa Mariña e un dos eventos máis esperados do ano: o Gran Prix de Carrilanas Marqués de Vizhoja que vai xa pola XXIX edición e na que está confirmada a participación de 70 carrilanas. Os actos festeiros comezan mañá sábado e prolongaranse ata o luns.

Concertos

• O bar O Curuxo de Laxe acolle esta noite, a partir das 23:30 horas, o concerto de Oîma. Olalla Liñares co clarinete, Martiño Senande co acordeón diatónico e Antía Ameixeiras co violín encargaránse de animar a noite coas súas músicas tradicionais onde non faltará o baile.
• Alan Louzán e Ángel García farán en dueto un concerto mañá, a partir das 23 horas, na Calzada, Cee.

Visitas guiadas

• Mañá ábrese o programa de visitas guiadas "Vimianzo. Historia Viva" cun roteiro polo centro da vila que leva por título “Vimianzo, a vila do castelo”. Neste percorrido, que comeza ás 11:30 horas e que é gratuito, os participantes descubrirán o seu pasado feudal. Testemuña del son os pazos de Trasariz e de Trasouteiro xunto coas casas de Tedín. Durante a ruta tamén se contempla a visita ao Muíño da Agra. O concello tamén ofrece representacións teatrais no Castelo e visitas guiadas na fortaleza (ás 12 e ás 19 horas) e nos Batáns do Mosquetín (ás 13 e ás 18 horas) así como a Mostra de Artesanía en Vivo.
• Visita guiada teatralizada nas Torres do Allo (Zas): Francisca Riobóo e a Víctor López Seoane regresan a un dos pazos máis antigos para explicarlle aos visitantes dun xeito ameno e dinámico como era a vida cincocentos anos atrás. A función, que se repite todos os domingos de xullo e agosto, comeza ás 19:30 horas. A visita guiada é gratuita e dura 35 minutos aproximadamente. Ademais, as Torres do Allo podense visitar todos os días da semana de 11 a 2o horas.
• Dolmen de Dombate (Borneiro) abre todos os días entre as 9 da mañá e as 21 horas. Dispón dun servizo de visitas guiadas en horario de mañá – de 11 a 14 horas – e tarde – de 16 a 21 horas –.
• O Forno do Forte, de Buño-Malpica, abre durante o verán entre as 11 e as 14 e de 16 a 20 horas, a excepción dos domingos.

Exposicións

• A casa da Cultura de Vimianzo acolle ata o vindeiro 30 de agosto a exposición fotográfica "Asunción, María e Jose" de Marcos Rodríguez.
• A  artista polaca Gosia Trebacz expón na sala de exposicións do faro Vilán a súa mostra de pintura “Mar de dudas”. Os seus traballos combinan  formas, materiais e cor dándolle así unha nova dirección aos seus traballos que buscan provocar a comunicación co espectador.

Outras citas

• Coincidindo coas festas do Carmen, Camariñas acolle dende hoxe e ata o domingo a Romaría Mariñeira Mercado Medieval.

Fonte

• Redacción QPC (info@quepasanacosta.com)