Fin de semana clave esta no comezo de ano. O Entroido chega con forza á Costa da Morte, e de feito, xa temos recollido Todos os programas de Entroido dos Concellos. Pero imos vendo pouco a pouco que nos trae a Axenda Costa da Morte dende este venres 8 de febreiro ao martes 12, o día grande!.

A fin de semana carnavaleira comeza en Carnota, con gran Concurso de Filloas na tarde festiva no pavillón. Iso será o venres, porque o sábado haberá visita á Torre dos Mouros con Asterix e Obelix, paralela ao Punto Científico.
Ten o venres tamén unha cita entroideira en Vimianzo, coa laconada&guateque dos Cherinkas, que abrirá o completo entroido vimiancés.
Pero ademais, a golpe de venres tamén poderemos ir á Festa da Xuventude de Mazaricos, ao fantástico Entroido-Karaoke de Laxe, a un monólogo en Cee, ou aos concertos de blues en Fisterra e de rock no Pindo.

O sábado comeza coas interesantes xornadas de reflexión "Voces da Periferia", en Corcubión. E a partir de aí, festa, moita festa.
Dende o mediodía, o entroido de Muxía abre a Ruta dos Pinchos, e terá a Gran Festa de Entroido a partir das 17:30 nunha carpa do malecón. Corcubión terá doble cita coas comparsas, sábado e domingo, mentres que en Zas terá lugar o Baile de Entroido.

O domingo será o día do Gran Entroido de Dumbría, con Mucha e Nucha como protagonistas. Tamén terá lugar o Festival de Disfraces de Mazaricos; a festa de Ponteceso con XIX Desfile de Disfraces, o mesmo que en Laxe, onde xa esperan a despedida do venres 15 co Caietano; ademais da Festa de Comparsas de Muros, onde tamén esperan, como en Carnota, polo enterro de Don Facundo, e que poderán repousar os doces coa presentación dun libro.

Pero non acaba aí a fin de semana. Luns e martes teñen citas obrigadas. En Vimianzo terá lugar o Gran Concurso de Comparsas de Entroido a tarde do luns. E outra das citas máis importantes terá lugar, como cada martes de Entroido, co Entroido de Fisterra.
Pero ademais, o martes tamén teñen lugar as citas grandes en Camariñas e Cabana de Bergabntiños.

A partir do mércores comezan as despedidas, cos enterros do Facundo polo sur, o Caietano, a Mikaela... pero desas festas xa falaremos para a semana.

Máis información

• Todos os programas de Entroido dos Concellos.
• www.axendacostadamorte.com.

Fonte

• Redacción de QPC ([email protected]).