Vén marcada esta fin de semana polos Entroidos, e máis concretamente polos divertidos Enterros, nos que a ironía faise a protagonista. Mañá coñeceremos a tradición destas celebracións pero polo de pronto imos repasando o que nos queda para estes días.

Xa pasamos por Muros para enterrar ao Facundo, o clásico do sur, e o venres xa temos cita co Caietano en Laxe. Un venres que ademais virá aderezado polo concurso de Pinchos de Corcubión, e que poderemos pechar disfrutando dun molólogo en Cee.

O Sábado de Piñata será o día grande de Entroido en Cee e mais en Baíñas e servirá para dicir adeus a outros senlleiros entroidos. Por exemplo, en Muxía terá lugar o Enterro do Percebe da Barca, que irá acompañado da Ruta dos Pinchos durante o sábado e o domingo. Tamén hai cita co Enterro da Sardiña de Camariñas, con Velorio incluído.

Pero unha das festas máis esperadas do entroido costeiro é, sen dúbidas, a Mikaela de Buño. Centos de mozos de toda a comarca de Bergantiños desprazaranse o sábado á vila malpicá para celebrar o pasarrúas da falla máis fresca de toda a bisbarra.

Outra das citas esperadas, é a IX Motofesta Invernal de Ponteceso, que encherá de ruido a vila de Pondal.

E o domingo Malpica volve ser protagonista co Enterro de Farruco en Seaia e de Faustino na propia capital.

E como non, para rematar a fin de semana, a habitual cita teatreira en Vimianzo, desta volta coa Aula de Teatro da USC e a súa obra de "Agamenón. Volvín do supermercado e deille unha malleira ó meu fillo".

Máis información

• Todos os programas de Entroido dos Concellos.
• www.axendacostadamorte.com.

Fonte

• Redacción de QPC ([email protected]).