Axenda da fin de semana do San Pedro na Costa da Morte

14:15 27/06/14

Non damos abondo coa AxendaCostadaMorte. Cada semana máis e máis eventos, máis e máis festas, e se a pasada tocaba San Xoán, esta toca San Pedro. Pero antes do repaso, coma sempre, o primeiro que facemos é ver como vén o tempo da man dos amigos de 4gotas, que por certo, están de noraboa pola inauguración da app Whatoweather, mesturando metereoloxía e moda. Este é o parte para a fin de semana na Costa, que lamentablemente non será o agardado nesta época do ano:
O venres haberá moitas nubes e malia que abrirán un chisco no mediodía, a media tarde voltarán máis nubes e na noite xa deixarán chuvias. Choverá na madrugada do sábado e ata o amencer.
Co paso da borrasca, o anticiclón irase achegando a Galicia, pero non o dará feito. Quedará vento do noroeste, frouxo con refachos moderados, e achegará moitas nubes á Costa; especialmente ao litoral maís norte (entre Muxía e Malpica) onde predominarán as nubes sábado á tarde e domingo, pegadiños ao litoral entre Fisterra a Muros, abriranse bastantes claros a partir do sábado a tarde, pero as temperaturas non superarán os 22ºC.

E veña San Pedro

Comeza a fin de semana cargada cun venres completo, se ben o San Pedro arrincará o sábado. E arrincamos en Carballo, onde ademais da verbena do San Xoán, teremos un dos primeiros festivais do verán: Rockin’Carballo.
Teremos tamén para a noite do venres a Romaría da Raigañas que continua o sábado coa Fest’Arxa de Cerqueda. Temos tamén un monólogo e un concerto reggae en Cee, e estas si, as Festas de San Pedro da Ponte do Porto, que seguirán o sábado.

Para non perder o San Pedro de Muros, o San Pedro de Corcubión, o San Pedro do Pino do Val, o San Pedro en Berdoias, o San Pedro de Buxantes, o mesmo San Pedro da Ponte do Porto ou o San Pedro de Santa Comba.

O sábado tamén segue o San Xoán carballés, con rock e Habaneras. E teremos outras posibilidades, ademais de ir de troula, como a presentación do libro de Suso Bahamonde en Fisterra, o fantástico concerto dos nenos de La Voz Kids en Carnota, coa participación do liracho Xurxo Trillo, ou, tamén, a Festa da Xuventude de Fisterra.

Non esquezan que o domingo é o día propio do San Pedro, polo que as romarías e as sesión vermú, serán as protagonistas.