Co bo sabor de boca que deixou a completa #axendaCostasdaMorte da Semana Santa, chega unha nova fin de semana moito máis tranquila en canto ás citas co ocio se refire. Tal e como o indica o parte costeiro de 4gotas.com, o tempo volve a ser o protagonista dos vindeiros días. "A situación atmosférica tranquilizouse tras un martes e mércores máis que chuviosos - 180 l/m2 en Carballo, 150 en Zas e Vimianzo, 100 en Camariñas e Malpica nesas 48h -; polo que hoxe será un día moi tranquilo. A medida que pasa o día irán chegando nubes a costa entre Fisterra e Carnota e acabarán predominando nese litoral, mentres que no resto predominará o sol. Subirán as temperaturas polo que será un día moi agradable, agás nese litoral. Mais o anticiclón non aguantará o empuxe dunha nova borrasca e volverán as chuvias. Iso si, non terán nada que ver coas do martes e mércores.  Choverá xa na mañá do sábado en toda a costa - nos arredores de Malpica moi pouco -. Ao mediodía intensificaranse as choivas e soprará forte o vento do sur. É moi posible que non chova e cese o vento na tarde e noite do sábado, para volver as chuvias e o vento do sudoeste na madrugada. O domingo será un día chuvioso, pero non choverá de xeito persistente, se non que o fará por momentos, con raiolas de sol entre chaparrón e chaparrón. De cara a noite do domingo arreciará o vento do suroeste e intensificaranse as chuvias". Citas culturais

• O concello de Vimianzo pon mañá en marcha o "Abril Verdadeiro" con Daboapipa que traen o seu espectáculo "As Lavandeiras".  A golpe de contos e de música, os espectadores meteranse de cheo no oficio das lavandeiras. Diso encargaranse Vero Rilo e Santi Prieto. A cita comeza ás 21 horas.
• Xurxo Souto visita mañá a biblioteca de Muxía. Será a partir das 19:30 horas cando comece a súa charla de “Oceáno para terrícolas”.

Verbeneo

• Festas da Virxe do Monte de Camariñas. Esta noite retómanse as festas da Virxe do Monte de Camariñas despois de que o mal tempo obrigase a cancelar moitos dos actos previstos para a pasada fin de semana. Actuarán o grupo Ciclón e a discoteca móvil Impacto. O sábado tamén haberá troula.
• Lira continúa mañá coa celebración da festa dos Remedios Novos con baile todo o día e verbena tremenda con Los Satélites e París de Noia.

Concertos

• O novo Disco Pub Nerio, un dos máis veteranos de Cee, cumple o seu aniversario dende que Ovidio Castro e Mario Rodríguez tomasen o mando. O acontecemento celébrano hoxe coa actuación de La Ricura.
• Tamén hoxe, a banda New Orleans Trio trae os seus ritmos negros ao pub A Ventana de Laxe a partir das 23:30 horas.

Exposicións

• O faro de Fisterra acolle durante estes días unha mostra moi peculiar. "Reborn Bones" é unha exposición composta por 39 esculturas realizadas con osos de animais mortos por causas naturais.
• A sala de exposicións do faro do Cabo Vilán acolle ata o vindeiro 30 de abril unha mostra da Fundación Teresa Rego de mantillas e velos feitos de encaixe a partir do século XV en adiante.