Donato, con acento costeiro

Deportes Malpica Fútbol da Costa

Donato, con acento costeiro

11:02 31/05/16

Xa está na rúa o novo libro futboleiro con acento costeiro. Despois de crear Mar de Paixón co seu tío Luís Porto, Héctor Pose vén de rematar a súa última aventura literaria. "Donato" chámase o novo libro do malpicán publicado pola editorial barcelonesa Damajuana.

Son 190 páxinas pulcramente ilustradas, entre as que destaca unha longa carta en primeira persoa que o exfutbolista hispano brasileiro lle escribe ao seu referente vital, seu pai, para contarlle como lle foi na vida. Donato cóntalle a Héctor a súa infancia nos arrabais de Río de Janeiro, as súas primeiras patadas a un balón de coiro no Nacional FC, a fichaxe polo América CF e logo o Vasco da Gama de Romario, Mazinho, Roberto Dinamita... e gañar tres veces o campeonato brasileiro.

A historia do brasileiro non sería a mesma sen España. Viría axiña Jesús Gil a fichalo para o Atlético de Madrid ou Lendoiro por aquel iniciático Super Dépor, a selección española... Respóndelle ao pai con outra misiva e logo hai unha posdata, o making of do libro a modo de diario, onde o autor relata todos os pormenores do libro. O prólogo asínao..., outro grande fundamental para a historia branquiazul, Bebeto.

A obra está salpimentada coas opinións de máis de 50 personalidades do mundo do fútbol, a quen o autor tivo a sorte de entrevistar por múltiples medios: Zico, Bebeto, Mauro Silva, Ricardo Rocha, Jorginho, Fernando Hierro, Aldana, Djukic, Fran, Arsenio Iglesias, Julen Guerrero, Del Bosque, Irureta, Javier Clemente, Enrique Cerezo, Luis Enrique, Unzué, Lendoiro, Michael Robinsom, Paco González, Futre…

Presentacións

A obra xa se presentou aos medios deportivos de Madrid a pasada semana e farase o propio o día 9 de xuño ás 20:00h na Deportenda de Riazor. Logo, virá un amplo periplo de presentacións por Galicia e resto do Estado. Esta semana estará á venda en todas as librerías de España e Latinoamérica.