E xa no meramente deportivo, foi unha xornada completa esta do ecuador de novembro, que xa chega con arrecendo ao #AlbumdaCosta... Esta semana teredes novas!.
Comezamos o repaso pola Preferente, malos resultados para XSC, Dumbría e Soneira. Os dumbrieses non traían nada de Chantada, quedando con 19 puntos. Mentres, o novo Soneira de Manolito polo menos mantiña un punto ante o Narón, un rival directo que queda 2 puntos por abaixo, no límite do descenso.
Non foi boa a xornada na 1ª Autonómica para os nosos. 4 derrotas, e algunha preocupante, e un empate, foi o balance dos nosos. O Ponteceso, o que máis preocupa, recibindo un 7-1 en Padrón que deixa as cousas no limbo e o equipo pechacancelas. Non están moito mellor as cousas en Camariñas, con algo de marea interna e xa metidos no descenso, con 9 puntos, 2 máis que o Ponteceso, tras caer na casa co Arzúa. O Baio caía ante o Unión, que o alcanza, e o Malpica prantaba cara pero volvía de baleiro de Noia. O único punto,o da Esteirana en Sigüeiro.
Na 2ª Autonómica, o Outes segue sen dar marcha atrás e mantense con 5 puntos sobre un Sofán que tampouco levanta o pedal. Ambos vencían comodamente a Mazaricos e IDC. O Zas queda 3º tras vencer en Carnota, e no partido da semana Fisterra e Cee remataron en táboas, un resultado que lles vale para manterse a distancia prudente. O Corme, que parecía que estaba collendo o ritmo e que se aía enganchar pronto, caía con rotundidade en Buño, e o Castriz parece que se non acaba de asentarse na competición e volvía perder, desta volta en Muros ante o Volantes, quedando na 10ª praza, xa por detrás do propio Buño, do Porteño e do Carnota.
E na 3ª Autonómica, tras 4 xornadas queda só o Baíñas no liderato tras vencer en Corcoesto e aproveitarse da derrota de onte do Montelouro ante o Ameixenda. Os vimianceses se reafirman como candidatos a todo. Ademais, o Coristanco parece forte con 9 puntos, por diante de Lira, Nantón e Seaia, cando xa non queda, tralo empate do Laxe ante o Muxía, sen puntuar.
Mentres, en Xuvenís, no Gr.3 o Dumbría non sumaba pois se suspendía o seu partido co Lira porque o cadro carnotán non xuntou xente suficiente. Por detrás chegaba partidos importantes, dos que saen reforzados Esteirana e Cee. Os primeiros vencían pola mínima en Santa Comba, e o Cee en Muros, meténdose nos postos de ascenso e deixando lixeiramente atrás a todos os rivais. No Gr.4, o choque da xornada disputábase en Corme onde o Malpica reafírmouse como máximo candidato ao título. Queda, tras vencer 1-3, líder con 3 puntos sobre o Cabana, que descansaba, e 5 sobre o Corme. Un Corme que terá que pelexar co Ponteceso, que está a só 2 puntos tras practicmente arrincar todas as opcións do Baio; e mesmo co Coristanco, que segue a loita de preto.
Nova demostración de poder do Dumbría na División de Honra Cadete. Os costeiros vencía en Conxo e se manteñen 4º na táboa, empatados co Lugo, 3º, e só por detrás dos grandes, Celta e Dépor. Tamén venceu o cadro dumbriés na Liga Galega Infantil alcanzando xa ao Bergantiños na 12ª praza, e con total intención de meterse na metade de arriba para disputar a Liga polo título e non a do descenso. O que non sei vai librar será o XSC, aínda con 3 puntos pero sen decaer.
Continúan tamén a Liga Cadete, na xornada 3, e a Liga Infantil, xa na 11. En Cadetes o Muxía queda só arriba de todo mentres a atención centrábase no San Paio de Refoxos cun Cee-Corme por todo o alto. Os dous equipos chegaban imbatidos, e foi o Corme o que quedou cos 3 puntos que o deixan só no liderato.
Foi xornada intensa tamén nos Veteranos, onde seguen Laxe e Coristanco sorprendendo na loita polo liderato, co Soneira xa colocado para atacar, xa posto por diante de Baio e Zas.
E na Liga Intermunicipios segue o Cereo arriba de todo tras vencer con máis solvencia da esperada ao Rus. Por detrás, pegado, o Cances, que goleaba escandalosamente ao Seaia. Brea e Valenza, que vencían, e Baldaio, que descansaba, seguen moi preto.
