AGE tamén denuncia a opacidade da Xunta co fraude forestal

Dumbría Muxía Vimianzo Costa da Morte

AGE tamén denuncia a opacidade da Xunta co fraude forestal

15:23 21/03/13

parcela forestal en Santa Comba afectada polo Caso Maceiras

Primeiro foi a Fruga, logo o PSdeG, despois o BNG e agora AGE. Todas as formacións da oposición denuncian os chanchullos que existiron na concesión de subvencións para a repoboación na zona da Costa da Morte tras un ano dende que saltou á luz pública.

Neste sentido, o deputado Antón Sánchez lembra que o tribunal de Contas da Unión Europea emitiu un informe segundo o que Galicia é unha das “rexións” en que máis se dan os erros nas subvencións. O deputado de AGE presentou unha pregunta para que o Goberno galego responda en sede parlamentaria sobre se vai depurar responsabilidades na trama de subvencións de Vimianzo e para coñecer que opinión lle merecen as conclusións do documento do Tribunal de Contas europeo.

Dende AGE consideran "inaceptábel que os responsábeis do PP na Xunta agachen a súa responsabilidade nesta trama”, denuncia o parlamentario de AGE, “e non fagan nada e así acepten unha situación de fraude e corrupción”.

Nesta trama, ben repasada ao día en QPC, técnicos da Xunta de Galicia avalaron coa súa sinatura unha escura trama, arestora investigada polo xulgado de Corcubión, de subvencións para a reforestación de terras en concellos como Dumbría, Muxía e Vimianzo. Estas axudas, concedidas no distrito forestal V de Vimianzo, eran solicitadas por particulares –mesmo con firmas simuladas ou coa identidade de persoas falecidas- pero sen o seu coñecemento. O importe das mesmas remataba sempre no peto dun empresario. Estes ubsidios inclúen presuntas inspeccións de campo realizadas por persoal da Consellaría de Medio Rural e autorizadas por técnicos do Goberno galego.