Trala suspensión da pasada xornada dominical polo paso da borrasca Hermina practicamente en todo o fútbol galego, a RFGF vén de decicir cando se disputan as competicións autonómicas. Pendentes aínda de decidir as datas que dependen da Delegación da Coruña, anunciamos xa que:

• A Preferente e a 1ª FUTGAL disputarán a x.19 o xoves 17 de abril (festivo de Semana Santa).
• As 1ª Xuvenil, Cadete e Infantil xogarán o sábado 1 de marzo.
• A 2ª División Galega Feminina (x.17) e a 3ª División Galega Feminina (x.12) disputarán a xornada o domingo 2 de marzo.

En todo caso, o 2 de marzo hai Oitavos da Copa da Costa Feminina, que terá que ser modificada.

Horarios para a finde

Volve, esperemos que non chegue outra borrasca, o Fútbol da Costa, cun carrusel dominical completo en www.futboldacosta.com, onde temos máis de 100 horarios actualizados xa.

E volve con protagonismo para a Liga da Costa FEM, porque o partido da xornada, para pechar a primeira volta, é o choque entre o líder invicto, o Corme, e o inmediato perseguidor, un Muxía que chega a 8 puntos (na foto de Fin Lema o choque do ano). Unha vitoria cormelá deixará a liga encarrilada, pero unha vitoria das muxiáns apretará a clasificación e deixará todo aberto para a segunda volta.

Finalísima tamén a que afronta a Esteirana no Gr.4, enfrontándose ás colíderes, un Céltigas que chegan tamén a este final da primeira volta sumando partidos por vitorias como as blaugranas. 

Ademais, na 2ª FEM, o Xallas, líder provisional cun partido máis, visita ao Lugo B, esperando ademais que o Pastoriza (2º) tropece ante o Tordoia (3º). Dumbría e Cee teñen partidos matitunos ante rivais asequibles como Burgo e Orillamar.

No Fútbol masculino, cómpre destacar un San Lorenzo - Fisterra na 1ª, importante sobre todo para os carballeses, como un dos últimos trens para subirse á pelexa pola permanencia.

Partido importante ademais para o Dumbría (2º) ante o 4º clasificado, o Boimorto, que chega a só 6 puntos dos dumbrieses, e tendo en conta que o líder, o Club do Mar seguramente sumará s 3 puntos ante un equipo da zona baixa como o Vea.

Na Liga da Costa temos tamén bos partidos, como o derbi de necesidade entre Corcubión e Cee, o Baio (5º) - Monte Louro (3º) ou o Soneira (4º) - Xallas (2º), buscando non perder comba do lider, un Camariñas que recibe ao Ponteceso. 

Na 3ª, o Zas (3º) - Cerqueda (5º) perfílase como o partido dunha xornada que tamén terá un derbi entre Seaia e Malpica.

Ollo tamén ao partidazo da D.H. de Veteranos que se celebra na Porta Santa o domingo entre o San Ramón (2º) e o At. Carballo (1º), con apenas 2 puntos de diferencia entre ambos, e a só 10 xornadas de que remate a liga.