O ano pasado xa foi un evento tremendamente especial. Pero este 2023 é o 60 aniversario da morte de Che de Pedro (José Esperante). Este veciño da parroquia de Eirón foi asasinado polas forzas de seguridade o 22 de xaneiro de 1963 mentres defendía o seu monte veciñal, e o Instituto Galego de Terras Comunitarias (INGATECO) está a convertir a súa figura no centro da homenaxe ás Comunidades de Montes de todo o país.

Así, e en colaboarción co Concello e a ORGACCMM (Organización Galega de Comunidades de Montes Veciñais en Man Común), este sábado 21 de xaneiro, Mazaricos acolle a celebración da segunda edición do Día da Loita da Veciñanza Comuneira na Defensa do Monte Veciñal. Un evento que arrincará ás 11:00h no Centro Social de Eirón, nunha xornada que homenaxeará e reivindicará a memoria histórica das persoas que se mobilizaron en defensa da propiedade da terra e do monte veciñal dende moitas parroquias galegas ante os intentos de roubo e usurpación acompañados, decote, por dura represión.

Este ano homenaxearase a Llorenç Soler, cineasta que retratou a conflitividade social da Galicia dos anos 70, incluíndo a loita polo monte comunal, finado o pasado mes de novembro. Soler realizou ous filmes documentais en Galicia que son perfecta testemuña fundamental da conflitividade e as loitas na defensa da terra e contra a especulación na Galicia da Transición: “A autopista, unha navallada á nosa terra” e “O monte é noso”.
Desta volta proxectarase o seu último traballo, “O monte é noso”. logo dunha introdución de Anna Turbau, fotógrafa e compañeira de Llorenç Soler.

Ás 13h terá lugar no monumento erguido en San Fins de Eirón unha ofrenda floral, na que intervirá un ano máis unha representación da familia Esperante.

Novas relacionadas

• 2022: Mazaricos lembrou a historia do asasinado Che de Pedro durante o Día da Loita da Veciñanza Comuneira.