The Rapants e 9Louro enchen de arte a Semana Cultural do IES As Insuas
Menudo nivel que están tendo as Semanas Culturais da nosa contorna. Hoxe facemos parada no IES As Insuas de Muros, para repasar o acontecido nesta pasada última semana de abril, cunha marea de actos culturais diversos, entre os cales destacaron as actividades musicais coa presenza de 9Louro e The Rapants-
Os amantes da cultura da Ría de Muros e Noia xa teñen hai tempo posto un ollo no que se coce no instituto As Insuas, situado na parroquia muradá de Serres. Este centro educativo recuperou hai tres anos a súa semana cultural, cun formato aínda máis ambicioso: organizar
actividades culturais en todas as horas lectivas para todos os grupos á vez. Isto requiriu unha enorme organización por parte do persoal, aínda que a pasada semana puidese descansar ao quinto día, xa que era festivo. Ben é certo que, tal como indica a dirección, o alumnado facilita o traballo, pois caracterízase pola colaboración e implícase a fondo nestes días de aprendizaxe diferente. Tanto é así que mesmo houbo alumnas que ofreceron os seus coñecementos en obradoiros destinados aos seus compañeiros.
Con este evento o IES As Insuas demostra a súa aposta pola aprendizaxe nun entorno colaborativo botando man de diversos puntos de interese. Concéntranse así moitas actividades de educación emocional, sanitaria, medioambiental, científica e deportiva, que conviven con
outras máis puramente humanísticas (debuxo, escritura, literatura, oratoria, sociolingüística...). O alumnado puido coñecer mellor o entorno en senllos roteiros a pé: un percorrendo algunhas das fontes de Muros e outro consistente nunha subida aos petróglifos de Cova da Bruxa.
Pero se algo destacou sobre todo na presente edición foi a presenza musical, e de alto nivel.
Non só polos obradoiros de percusión ecolóxica (usando tambores de pintura baleiros) de Didier Díaz, os de regueifa a cargo de Xairo de Herbón e Nuria das Cruces ou o de baile moderno impartido por Claudia Tajes e seu irmán Aday, senón, e sobre todo, polo encontro con exalumnos que están a triunfar na escena musical actual. O mércores 29 a xornada rematou coa entrevista, con moitas preguntas da rapazada, a Martín Louro e Fabio Vázquez, coñecidos artisticamente como 9Louro e Faviovz, respectivamente, compañeiros nun proxecto musical vertixinoso que aflorou en pouco máis dun ano.
E, como punto final, o 30 de abril, o privilexio de contar, grasas ás xestións do Concello de Muros, con The Rapants, grupo que xa transcendeu hai tempo as fronteiras para situarse nun lugar relevante da música galega e española. Así o demostraron hai un mes, cando actuaron ante 6.000 persoas no Multiusos do Sar en Santiago.
Desta vez, nas Insuas, o público non era numeroso mais era todo o instituto vibrando coa súa música, e igual a calquera en entusiasmo.