Sorte temos na comarca de unirnos ao proxecto Ponte... nas Ondas. Unha iniciativa que foi recoñecida pola UNESCO como modelo de boas prácticas co PCI (Patrimonio Cultural Inmaterial), que percorre o país poñendo en valor o patrimonio cultural, lingüístico e etnográfico de Galicia e Portugal a través da radio escolar.

Trala visita a Caión e Vimianzo, o proxecto recalou este xoves 30 de abril en Muros, e da man do xornalista Xosé Manuel Diego Ferreira como mestre de cerimonia, centos de escolares da vila muradá gozaron dunha xornada no marco do "RadioVisual do Patrimonio". “Entre o chiar das gaivotas que debuxan círculos no ceo e o arrecendo a salitre que inunda as rúas, as conversas de Muros aínda gardan o eco de palabras antigas; palabras que saben a mar e a historia”, enfiaba Ferreira.

O RadioVisual do Patrimonio é un proxecto de dinamización cultural, educativa e social ao longo das rutas xacobeas, baseada na realización de eventos participativos en directo que combinan música, palabra e creación audiovisual. A iniciativa conecta territorio, mocidade e comunidade, xerando contido e experiencia arredor dun dos principais símbolos culturais de Galicia.

Na segunda das súas paradas esta primavera, o Radiovisual comezou coa animación musical do dúo Caamaño & Ameixeiras, que armadas unicamente de violín, acordeón e voz fixeron gozar o público coa súa destreza na reinterpretación da música de raíz.

 

 

 

 

View this post on Instagram

 

 

 

 

 

 

 

 

 

 

 

A post shared by Que pasa na Costa (@quepasanacosta)

Pasou despois polos micrófonos a alcaldesa de Muros, María Lago Lestón, quen se enfrontou ao desafío das cuestións e a curiosidade do alumnado, que encheu toda unha caixa de preguntas para a que quedou curto o tempo de peneiralas todas.
Subiu despois ao escenario Vicente, Chente, “un home que leva o salitre marcado na pel e o horizonte gravado nos ollos”, muradán xubilado logo de cumprir o soño de ser patrón do seu propio barco, quen guiou a rapazada pola súa memoria mariñeira. 

 

E na voz tamén do alumnado, escoitamos, a xeito teatralizado, todo un abano de vocabulario pouco coñecido: ghaldrupeiro, esbaghasado, cachimán, culimaia, sorromatrocos... Ao fío, a rapazada, acompañada da profesora María Xosé Lago, explicoulle a audiencia o proceso de recollida e peneira das palabras. O traballo arredor das imaxes do patrimonio ocupou tamén espazo neste radiovisual, xa que o IES Fontexería leva desde a primeira edición do Certame de Imaxes do Patrimonio de PNO! moi comprometido na peneira de imaxes con historia que contan saberes. 

A xornada puido seguirse en directo na rede a través da web www.oradiovisual.com e da web da asociación Ponte... nas Ondas! (www.pontenasondas.org), onde xa se pode ver tamén a gravación do evento. 

 

 

A iniciativa conta co apoio da Axencia Galega de Industrias Culturais, a través da súa liña ‘Territorio Cultura’, destinada á ampliación e diversificación de oferta cultural en áreas non urbanas.  

Máis novas do Proxecto