Segue medrando o tan necesario proxecto formativo do IES Ramón Caamaño en materia de hostalería. O esforzo e dedicación tanto dos equipos directivos como do alumnado está conseguindo grandes fitos, como o que vai protagonizar o alumno Gabriel Mugridge, estudante de Formación Profesional Básica (FPB) de Cociña e Restauración do centro muxián, converterase no primeiro alumno de FPB de Galicia en participar no prestixioso Concurso de Coctelería Fragas do Eume, que terá lugar o vindeiro 5 de marzo.

A súa participación supón un feito moi importante tanto para o centro educativo como para a propia FP Básica, xa que é a primeira vez que a organización do certame invita a un centro de Formación Profesional Básica a competir nun evento destas características.

Para esta ocasión, Gabriel presentará o seu cóctel “London-Mojito”, unha versión persoal do tradicional mojito, reinterpretada con matices propios e acompañada cunha gominola elaborada con canela, menta e laranxa, que reforza os aromas e aporta un contraste doce e especiado á proposta.

O alumno estará acompañado polo seu profesor e preparador, Alberto Fuentes, quen destacou e puxo en relevancia a importancia desta participación.

A importancia na nosa comarca da FP Básica de Cociña e Restauración

A FP Básica de Cociña e Restauración é unha opción formativa aberta a todas aquelas persoas que non teñan o título da ESO e que queiran orientarse cara ao sector da hostalaría. O ciclo estrutúrase en dous cursos: no primeiro ano o alumnado fórmase en Servizos de Restauración e no segundo en Cociña. En ambos cursos realízanse prácticas en empresas do sector, favorecendo a inserción laboral e a adquisición de experiencia profesional real.

A participación de Gabriel Mugridge neste certame representa non só un logro persoal, senón tamén un motivo de orgullo para o centro e para toda a comarca.