A lonxa de Muxía acollerá este sábado 16 de novembro o Magosto das Abaladeiras. Coa colaboración municipal, a lonxa de Muxía será desde as 16:00 horas escenario de numerosas actividades para a rapazada, cunha xincana con xogos populares como as carreiras de sacos e relevos con castañas.

A música será a gran protagonista do evento e correrá a cargo de ‘Abaladeiras de Muxía’, que a partir das 18:00 horas celebrarán unha foliada na que estarán acompañadas por diversos grupos invitados pertencentes ao folclore galego.

As persoas asistentes poderán gozar de castañas asadas de balde para celebrar esta tradicional festividade do outono galego.