Os Cabezudos manteñen viva a auténtica Romaría da Barca
13:15 14/09/15
Os Cabezudos da Barca saíron cos Xaramiños do Corpiño-Foto-Lalo Búa
”Molleime máis na Barca que na Festa da Auga de Vilagarcía”, dicían algúns dos asistentes á Romaría da Virxe da Barca de Muxía este ano. Pero a única Festa de Interese Turistico Nacional da Costa da Morte ten máis forza que o vento de nordés. Non tanta como para abalar a Pedra, que tampouco abalou a pesar das obras, polo que a gran protagonista volveu ser a Pedra dos Cadrís, vendo pasar e escoitando os rogos dos seus fregueses.
Centos de romeiros ateigaron Muxía durante toda a fin de semana, con especial incidencia na misa do mediodía do domingo. Repectou a chuvia e romeiros de todas partes da península achegáronse para ver a primeira misa ao aire libre. É o momento máis auténtico da festa, onde se puido comprobar que a xente non coñece a verdadeira dimensión desta festa. De aí, toca procesión por toda a vila, para rematar na zona do porto a golpe de gran traca de bombas de palenque, un completo espectáculo do ruído.
E se falamos de romeiros fieis, temos que falar dos Cabezudos, que un ano máis volveron sair de pasarrúas, mantendo vivo o verdadeiro espírito, nestes tempos onde o “botellón” invade todo. “>Sabes que a Romaría estase perdendo, hai cousas que non se conservan xa, coma o tradicional baile que se facía no Cruceiro xunto ao Santuario, sempre ca Banda de Música, por iso creo que nos gustan tanto aos muxiáns, porque son do pouco que resiste da romaría como era antes”, reflexiona Viki Rivadulla.
Viki e máis Estrella Paz estiveron restaurándoos toda esta semana, e puideron saír acompañados polos Xaramiños do Corpiño, como o fan, só pola Barca, dende os anos 30, levando moita xente a recordar a súa infancia. Cóntanos Viki que mesmo antes había xigantes, pero agora só quedan Cabezudos. Son tradicionalmente os mozos (algunha vez ten saído algunha moza tamén) os que manteñen vivos os Cabezudos, pero custa erguerse despos da troula da noite anterior. Moitos rapaces xa empalman a festa nocturna co pasarrúas matutino, visitando as casas. Fermosa é a estampa de ver como a xente lles tira moedas dende as ventás e estes os recollen coas máscaras, e ala, uns cartiños no peto para as copas.
Outras estampas da Barca
Novas relacionadas
- Centos de romeiros da Costa da Morte peregrinan xa cara á Virxe da Barca.
- E a pedra non abala
- Recunchos da Costa: As Pedras da Punta da Barca.
- Viki Berre: “Que a Barca nos leve a alma, pero non o sentido común”:
- Manuel Vilar: A Barca: reflexións sobre unha xeografía simbólica.
- Lema Suárez: Reflexións sobre o incencio do Santuario da Barca de Muxía.
- Os bombeiros critican a falta de recursos pero louban a labor de Protección Civil no incendio da Barca.
- A imaxe da Virxe da Barca está a salvo pero os gastos da rehabilitación rozarán o millón de euros.
- Da repercusión do incendio do Santuario da Virxe da Barca.
- Un raio incendia o Santuario da Virxe da Barca por Nadal.
Fonte
- Redacción de QPC ([email protected]).