Captura da Plataforma de R onde se poden ver os partidos do Balonmán Xiria pola tele

Impresionante vai ser seguir os partidos o Balonmán Xiria pola televisión. O club carballés vén de anunciar, xunto con R, a nova plataforma de televisión multicámara de R, que lle permitirá emitir os seus partidos en directo, a través de streaming. Onte presentábase en sociedade ante unha máxima expectación esta pioneira experiencia na que o espectador pode escoller, entroutras cousas, o tiro de cámara que prefire en cada intre do partido.

Coas catro cámaras desta tecnoloxía, o club convértese en realizador do partido e mesmo pode personalizar a interface do evento; unha das cámaras é virtual e controlada por intelixencia artificial segue pola súa propia conta os avatares do partido.

Pioneiros

Presentación da nova canle de televisión do Balonmán Xiria

O alcalde de Carballo, Evencio Ferrero, manifestou a súa satisfacción pola “importancia de que sexa un club carballés o pioneiro en Galicia no aproveitamento das vantaxes desta innovadora plataforma de televisión multicámara”.

Pola súa banda Ricardo Añón, Secretario das Escolas de Balonmán Xiria, expresou así mesmo o seu orgullo porque no clube sexan “pioneiros no uso da plataforma de televisión multicámara de R, coa que socios e afeccionados poderán desfrutar na televisión dos encontros do club e personalizar o xeito de ver os encontros dos seus equipos”.

Como ver os partidos?

Os clientes da televisión R terán dispoñibles os encontros do Xiria a través do deco 4K do operador galego. Terán unha app instalada chamada “deportes R” na que ver en calquera momento os contidos dispoñibles e velos con toda comodidade, pausándoos, rebobinándoos ou avanzando. As emisións dos partidos do Xiria na televisión R comezarán o 15 de decembro.

O sistema tamén permite dispoñer dunha aplicación para Android ou iOS na que desfrutar de calquera evento deportivo gravado por esta plataforma a través do móbil.

Fonte

• Redacción de QPC (info@quepasanacosta.com).