Ábrese unha nova semana na FEP con Xabier P. Docampo

09:22 26/07/11

Chega a semana grande da Escola de Verán da Fundación Eduardo Pondal. E comeza na mañá deste martes, 26 de xullo de 2011, co escritor Premio Nacional de Literatura Infantil, Xabier P. Docampo. Docampo participa nesta mañá nun obradoiro literario co alumnado, pero tamén vaise conmemorar o 25 aniversario da publicación do seu libro O misterio das badaladas. Non é a primeira vez que Docampo participa na Escola de Verán da Fundación Eduardo Pondal, xa que xa participara o pasado ano. O mércores 26, a totalidade dos asistentes á Escola de Verán, arredor duns 70 alumnos e alumnas, asistirán nunha saída á localidade de Gres para realizar un intercambio coa Fundación Xosé Neira Vilas. O alumnado conversará co autor das Memorias dun neno labrego, visitará as distintas dependencias do edificio e coñecerá distintos puntos de interese da contorna. A semana pecharase coa segunda representación da obra de teatro de rúa Noites do prácido luar, que se estreara con gran éxito de público no mes de maio durante a celebración das FestiLetras 2011. A cita será ás 11 da noite. As escenificacións terán lugar na eira da Casa do Cura, polas rúas do Couto e na praza do Quinteiro. A obra está dirixida por Lucho Penabade e o elenco de actores está conformado por mocidade do Couto e arredores. Tamén participa a Coral A Oliveira do Monte Branco.