Segue dándolle cor a súa pequena aldea galaica a xente do Couto. Unha desas aldeas máxicas, nas que a palabra comunidade cobra sentido máximo, como o demostra a implicación da veciñanza na Escola de Verán ou no Festiletras. 

Outro dos proxectos que serven para afondar nesa colectividade, ademais dos murais, é O Couto Florido, que arrincaba por primaveira dividíndose en tres fases: Sementes, Maio florido e Colleita. 

Onte, a veciñanza toda recibiu á  conselleira de Medio Ambiente e Cambio Climático, Ángeles Vázquez, para pechar, coa Colleita, este proxecto de colaboración público-privada que impulsou intervencións centradas na paisaxe, na flora autóctona e na dinamización social nunha aldea de Ponteceso. Trátase dun proxecto ambiental e participativo que pode servir de exemplo e replicarse noutros pobos galegos.

O proxecto Couto Florido conta coa participación do Instituto de Estudos do Territorio (IET), a través da achega de 18.000 euros, e das fundacións Juana de Vega e Eduardo Pondal. A implicación institucional da Xunta enmárcase no desenvolvemento das estratexias de Infraestrutura Verde e de Biodiversidade 2030, que pretenden asegurar a conservación da natureza, a mellora da conectividade ecolóxica e a posta en valor do patrimonio natural e paisaxístico.

Acompañada por diversas autoridades, a responsable autonómica participou hoxe na aldea do Couto, nun percorrido por diferentes espazos do lugar para comprobar in situ os resultados das actuacións realizadas desde marzo a través desta iniciativa de recuperación e dinamización do rural. Tamén fixo entrega duns galardóns ás persoas que participaron activamente na mellora e coidado da paisaxe, actividade final desta experiencia de recuperación.

Intervencións do proxecto

Máis de 50 persoas participaron en marzo na primeira acción de diagnose de Sementes, achegando 89 propostas veciñais de mellora paisaxística. A través dunha experiencia colectiva, promotores e cidadáns identificaron valores, retos e oportunidades, así como os espazos a intervir con este proxecto.

Nos seguintes meses, técnicos paisaxistas realizaron un traballo técnico de transformación das propostas veciñais. Deste xeito, en maio, houbo unha xornada de plantación de especies autóctonas e ornamentais guiada por expertas en cultivo ecolóxico e prácticas de xestión sostible, que tamén contou coa participación de artistas e empresas locais para outras actividades. Así, Maio florido propiciou a plantación de 15 especies florais autóctonas e a distribución de máis de 35 xardineiras de barro de Buño e madeira en rúas e fachadas.

A iniciativa do Couto Florido rematou coa xornada Colleita, que incluíu unha ruta para coñecer o resultado das intervencións realizadas e coa entrega de galardóns en recoñecemento ás persoas que colaboraron activamente no proxecto. Así, entregáronse 10 xardineiras a xogo coas macetas que xa se utilizaron na intervención do proxecto.