O Teatro cumple 25 anos en Ponteceso
11:07 31/10/18
Presentacion do Ciclo de Teatro de Ponteceso
Falamos moito estes meses de outubro e novembro de teatro. Moitos son os concellos que apostan pola programación teatreira, e un dos que máis tempo leva é o Concello de Ponteceso. Onte celebraba a presentación do 25 aniversario do Ciclo de Teatro de Ponteceso. Unha demostración de compromiso cultural que chega ademais cun bo feixe de novidades.
A técnica de Cultura, Mely Amado, estivo acompañada do alcalde, Lois García Carballido, ademais de varios representantes das compañías que actuarán todos os sábados de novembro no Edificio das Escolas: Artur Trillo por Talía Teatro; Cándido Pazó e Alba Bermúdez por Contraproducións; e Gustavo del Río, por Os Náufragos Teatro. Quedou a foto ben xeitosa, con todos os carteis anunciadores do programa durante estes 25 anos.
Unha das singularidades é que unha das obras que se representou na primeira edición, repite. Falamos da renovada Commedia, dirixida por Cándido Pazó. Pero a actuación máis especial de Contraproducións no Ciclo será cos Fillos do Sol, xa que foi un encargo do FIOT e da Fundación Eduardo Pondal para conmemorar o centenario da morte do bardo. A protagonista Alba Bermúdez, ten raíces de Ponteceso, así que todo queda na casa.
Se a compañia Os Náufragos debuta en Ponteceso, a costeira Talía Teatro non falla, agradecendo a labor da xente que se preocupa pola cultura na vila de Pondal.
Proxectos: Un auditorio e un grupo de teatro
A presentación serviu para anunciar que o Concello traballa na construción dun auditorio. Ademais apuntaron que está en marcha a creación dun grupo de teatro de adultos que canalice o talento creado en tantos anos de escola.Café cos protagonistas
Este ano, coma novidade, haberá encontros entre actores e público todos os sábados pola tarde, antes das funcións. Serán xuntanzas abertas para que os espectadores poidan intercambiar impresións coas compañías e coñecer o mundo da escena un pouco máis de preto.Detalles
. As funcións celebraranse todos os sábados ás 22.30 horas no salón de actos do Edificio das Escolas. As representacións serán as seguintes:- O sábado 3, a compañía encargada de inaugurar o certame será Talía Teatro, trae unha revisión do clásico “O servidor de dous amos”.
- O sábado 10 correrá a cargo de Contraproducións, que presentará “Os fillos do sol”, unha elucubración teatral sobre a figura de Eduardo Pondal e a súa obsesión coa obra que centrou toda a súa vida como escritor: Os Eoas.
- O sábado 17, tamén Contraproduccións traerá “Commedia”, unha peza que cumpre tamén 25 anos sobre os escenarios.
- E xa o sábado 24, a compañía coruñesa Os Náufragos porá o broche de ouro ao certame coa súa carta de presentación, “Castrapo”, unha proposta actual e próxima ao espectador que narra a viaxe ás orixes, ás raíces.