Unha Noite do prácido luar encheu O Couto
09:15 02/08/11
Era a segunda cita de teatro na rúa da Fundación Eduardo Pondal logo da desenvolvida dentro das Festiletras 2011, alá polo mes de maio. A eira da Casa do Cura, as rúas de O Couto e a praza do Quinteiro enchéronse de xente que non quixo perderse durante a xornada do pasado venres, 29 de xullo, unha velada teatral.
En Noites do prácido luar conflúen cinco apostas creativas que dan como resultado un espectáculo apetecible e que xa conta con solicitudes para próximas representacións fóra de Ponteceso. Esas apostas son o texto de inspiración, centrado nos tres grandes autores do Rexurdimento como son Rosalía, Pondal e Curros, o grupo de gaitas Inllar, a voz privilexiada de Alba Costa, e o amplo grupo de mozos de O Couto que traballaron arreo durante moitas fins de semanas para a representación.
Noites do prácido luar pon en escena música tradicional e coral, danza e dramatización, nunha época que se remonta ó século XIX e na que os poetas Eduardo Pondal e Rosalía de Castro volven ó presente para mergullarnos nun mundo de versos (con regueifa incluída) e lendas que nos sitúan no rural galego, no que tamén está presente o mundo da emigración. Como elemento máxico, aparecen as fadas pondalianas e tamén as mouras que viven nas fontes de frescas augas que verten ó río Anllóns.
O elenco de actores e músicos é amplo, rolda a cincuentena de persoas que van actuando ó longo das distintas escenas. O papel de Rosalía de Castro é desempeñado por Sofía González, mentres que o de Eduardo Pondal corre a cargo de Esteban Rey Calvo. Tamara Lema Rodríguez desenvolve un triple papel de moura, cega e moza que marcha para a emigración.
Novas relacionadas
- Escola de Verán 2011: Ábrese unha nova semana na FEP con Xavier P. Docampo.
- Escola de Verán 2011: Poemas infantís con Xurxo Souto e Fran Alonso na Fundación Eduardo Pondal.
- Escola de Verán 2011: A Escola de Verán da FEP recupera os xogos populares.
- Escola de Verán 2011: O monitorado presenta a Escola de Verán 2011 da Fundación Eduardo Pondal.
- Escola 2010: Monte Branco fixo balance da Escola de Verán 2010.
- A Fundación Eduardo Pondal recibiu visita institucional.
- A Cova Céltica da Fundación Eduardo Pondal sumerxiuse nun San Xoán de tradicións.
- Unha noite no Prácido luar da Fundación Eduardo Pondal.
- Sábado de lecturas animadas e recordos da Casa do Cura na Fundación Eduardo Pondal.
Fonte
- Nota de prensa da Fundación Eduardo Pondal da man de Xosé Manuel Varela.