As voces locais encheron de música o pasado domingo o auditorio da Casa da Cultura no marco das actividades culturais do Outono Gastronómico do Concello de Vimianzo. O público respostou pois quería ver aos seus veciños subidos ao escenario.

Diferentes idades, diferentes tonalidades e diferentes estilos musicais fixeron pasar unha tarde musical moi especial, na que todos estes amantes da música demostraron que en Vimianzo hai talento, e moito, e con variedade de estilos musicais ao gusto de todos os públicos.

Unhas das protagonistas foron a voz de Laura Quintáns, que acompañada polo piano de Ana Torres, interpretaron o "Someone live you" de Adele.

Pasaron polo estrado Os Troitamundos, grupo de rock composto polos mozos de Vimianzo Pablo Rodríguez, Pablo Albite, Xaquín Lema, José Antonio Maceiras e Fabio Mouzo. Interpretaron un par de temas propios como Mafalda e Involución, e grandes clásicos como "Bailaré sobre tu tumba", "Íscalle lura" e "I love rock and roll".

Foi Rosa Oreiro a que tirou de voz para traernos "El sol no regresa", "Como una ola", "Mujer contra mujer" ou "Hoy quiero confesar".

Un dos máis espectaculares, foi Jaime Lema, que fixo de Vilaseco-Castrelo o seu méxico lindo para cantar varias rancheras.

Houbo máis rock, do de verdade, como o que brindou Suso Andrea, con temazos como "Bienvenidos", "Pero a tu lado", "Te quiero" e ata tirou de fados para cantar "María la portuguesa".

E o broche tróuxoo o grupo de Pasarela composto por Eduardo Lema, Dito Lema, Alejandro Vidal, Sindo e Jacinto Paredes, "Aserrín e Viruta", que tiraron de temas populares como Gozando na festa, Vals de Camariñas, O son dunha gaita, Na beira do mar e Islas Canarias.

E para o vindeiro domingo, toca sesión de música galega con Sés, un verdadeiro prodixio.

Novas relacionadas

• A música coral resoou na Terra de Soneira.
• Vimianzo abre o seu Outono Gastronómico con menús, sobremesas da casa e moita festa.
• “Do mar a Terra”, educando o padal.

Fonte

• Concello de Vimianzo.