Denuncia hoxe o sindicato maioritario no Concello de Vimianzo, unha serie de despidos e episodios de discriminación laboral no Concello. Sinala o sindicato que neste pasado mes despediuse a unha Animadora cultural que levaba 15 anos traballando, e a unha psicóloga que o viña facendo dende hai 8 anos, ademais de criticar que se externalizase o servizo de deportes, algo que se vén facendo dende hai anos. Considera o CSIF que "non existen causas organizativas nin económicas para xustificar estes despidos", xa que as arcas do Concello están saneadas. Critican tamén as indemnizacións de 20 días por ano traballado e pregúntalle ao grupo do BNG, "que tanto ten reivindicado o emprego público",  "é así como queren gardar o público?".

"Postos acadados en desigualdade de oportunidades"

O goberno municipal a este respecto simplemente quere sinalar que "se trata de profesionais que accederon ao posto de traballo no goberno anterior, un posto de carácter temporal e que acadaron en desigualdade de oportunidades". Por este motivo, "aínda que son decisións difíciles desde o punto de vista persoal e sentimental, o goberno debe facer un uso racional dos recursos públicos, máxime cando se trata de postos sen carga de traballo ou que se solapan con outros, tendo que buscarlle funcións para xustificar un salario", explica o grupo de goberno.

Fonte

• Redacción de QPC (info@quepasanacosta.com).